Qazyǵurt aýdanynda áleýmettik qoldaý júiesin tsifrlandyrýǵa arnalǵan oqytý seminary ótti. Seminar jumysyna Qazaqstan Respýblikasynyń Mádeniet jáne aqparat ministrligi janynan qurylǵan «Otbasyn qoldaý ortalyqtarynyń qyzmetin jetildirý jónindegi jobalyq keńseniń» basshysy Saǵyndyq Farida bastaǵan sondai-aq áleýmettik qoldaý sharalaryn tsifrlyq formatqa kóshirý baǵytyndaǵy pilottyq jobany iske asyryp jatqan jobalyq top músheleri qatysty, - dep habarlaidy Dalanews.kz
Seminarǵa arnaiy jumys saparymen kelgen top quramynda Túrkistan oblysynyń «Jumyspen qamtýdy úilestirý jáne áleýmettik baǵdarlamalar» basqarmasy basshysynyń orynbasary Kúmis Mirova da boldy.
Jiyndy aýdan ákiminiń orynbasary Madiiar Orazaliev ashyp, júrgizip otyrdy. Oqytý jumystaryna Qazyǵurt aýdandyq politsiia bólimi, aýdandyq ortalyq aýrýhana men emhana qyzmetkerleri, mektep direktorlary men tárbie isi jónindegi orynbasarlar, áleýmettik pedagogtar, aýyl okrýgi ákimderi men aýdandyq «Otbasyn qoldaý ortalyǵy» KMM mamandary qatysty.
Seminar barysynda QR Eńbek jáne halyqty áleýmettik qorǵaý ministrliginiń bastamasymen engizilip jatqan FSM Social aqparattyq júiesi jáne Socium avtomattandyrylǵan aqparattyq júiesi (AAJ) týraly keń kólemdi túsindirme jumystary júrgizildi.
Bul tsifrlyq platformalar memlekettik qoldaý sharalaryn kórsetýdegi protsesterdi avtomattandyrýǵa, memlekettik organdar men uiymdardyń ózara is-qimylyn tiimdi etýge múmkindik beredi. Sonymen qatar mobildi qosymshalar adami faktordy azaityp, sheshimderdiń durystyǵyn arttyryp, mamandardyń jumysyn jeńildetýge baǵyttalǵan.
