Ýran ken oryndaryn igerý máselesinde «Qazatomónerkásip» pen «Rosatom» arasynda kelispeýshilik týyndady, - dep jazady Dalanews.kz.
Qazaqstanda jańa ýran ken oryndaryn igerý birqatar qiyndyqtarmen betpe-bet keldi.
Munyń basty sebepteri tek kúkirt qyshqylynyń jetispeýshiligimen ǵana emes, sonymen qatar «Qazatomónerkásip» pen reseilik «Rosatom» kompaniialarynyń burǵylaý merdigerin tańdaý tóńiregindegi daýmen de bailanysty.
«Qostanai mineraldary» AQ tehnikalyq direktory Aibolsyn Smaǵulov, sala mamany retinde, bul kelispeýshiliktiń eki jaqqa da keri áseri bolýy yqtimal ekenin aitady.
Onyń pikirinshe, «Qazatomónerkásip» óziniń enshiles kompaniiasy «Volkovgeologiia» AQ múddelerin qorǵap otyr, al «Rosatom» naryqta asa tanymal emes Joint Drilling JShS-in alǵa tartyp, burǵylaý jumystaryn solarǵa berý jaǵyn qoldaidy.
«Eger birlesken kásiporyn josparlanǵan óndiris kólemine qol jetkize almasa, jaǵdai ýshyǵýy ǵajap emes», - dep atap ótti Smaǵulov.
Sondai-aq ol, bul qadamnyń «Rosatomǵa» degen senimsizdikti arttyryp, seriktester arasyndaǵy senim men syilastyqqa syna degen qaǵady degen paiymda.
"Jaǵdai budan ári ýshyǵyp ketse, elimizdiń Energetika ministrligi óndiris kólemin shekteý nemese kelisimshartty buzý máselesin qarastyrýǵa májbúr bolýy múmkin",- deidi ol.
2022 jyldyń sońynda «Rosatom» Túrkistan oblysyndaǵy «Býdenovskoe» birlesken kásipornyndaǵy 49% úlesti satyp aldy. Bul ken orny álemdegi eń iri ýran ken oryndarynyń biri sanalady. Bul úlesti satqandar – reseilik milliarder, Qazaqstanda týylǵan Vasilii Anisimov jáne qazaqstandyq milliarder Aleksandr Klebanovtyń uly Iakov boldy. Alaida, Bloomberg agenttiginiń málimetine súiensek, osynaý mámile «Samuryq-Qazyna» qorynyń bastamasymen jasalyp, «Qazatomónerkásip» basshylyǵynyń kelisiminsiz júzege asqan.
«Rosatom» — Resei úkimetiniń baqylaýyndaǵy memlekettik korporatsiia. Onyń Qazaqstandaǵy úlesi tek ekonomikalyq emes, saiasi yqpaldyń artýyna ákelýi múmkin. Reseidiń energetikalyq resýrstardy baqylaý arqyly aimaqtyq saiasi jaǵdaiǵa yqpal etý tájiribesi bar (mysaly, Eýropadaǵy gaz daǵdarysy). Bul jaǵdai Qazaqstannyń syrtqy saiasatyna Reseidiń qysym jasaý tetigine ainalýy múmkin deidi óz kezeginde sarapshylar.
