Reseidiń Qazaqstandaǵy elshisi Aleksei Borodavkin Qazaqstan ekonomikasyna salynǵan reseilik investitsiianyń shynaiy kólemi resmi derekten áldeqaida joǵary ekenin aitty, dep habarlaidy Dalanews.kz.
Elshiniń aitýynsha, Qazaqstannyń resmi organdary investitsiia kólemin eseptegen kezde offshor arqyly elge kelgen qarjyny eskermeidi. Osyǵan bailanysty Resei elshiligi men saýda ókildigi ózdiginen qosymsha zertteý júrgizgen.
«Resmi derekter boiynsha, Qazaqstan ekonomikasyna Resei tarapynan salynǵan jalpy investitsiia kólemi shamamen 27 mlrd dollardy quraidy. Bul – jyldar boiy jinalǵan investitsiia kólemi. Alaida bul sandar offshor arqyly Reseiden Qazaqstanǵa kelgen qarjyny qamtymaidy. Al biznes ókilderi investitsiia salýdyń osy jolyn jii qoldanady. Sondyqtan biz óz tarapymyzdan beiresmi túrde derekter jinap, nátijesinde shynaiy investitsiia kólemi resmi kórsetkishten eki ese artyq, 56 mlrd dollarǵa jetti degen qorytyndyǵa keldik», – dedi Aleksei Borodavkin TASS agenttigine bergen suhbatynda.
Eske sala keteiik, byltyr Resei Qazaqstanǵa investitsiia salý kólemi boiynsha sheteldik memleketter arasynda birinshi orynǵa shyqqan. 2023 jyly ǵana bul kórsetkish 4 mlrd dollardan asqan.
Reseilik investorlar Qazaqstanda tek taý-ken jáne energetika salalarymen shektelmeidi. Olar metallýrgiia, mashina jasaý, ǵarysh, elektr energiiasyn óndirý, kólik-logistika, munai-himiia, aýyl sharýashylyǵy, tyńaitqysh óndirý, IT-tehnologiialar, jańartylatyn energiia kózderi jáne qyzmet kórsetý salalaryna da belsendi túrde qarjy quiyp otyr.
«Qazaqstanda reseilik investitsiia men tehnologiialar qatyspaǵan ekonomikanyń birde-bir salasy qalmaǵan shyǵar», – dep atap ótti elshi.
Buǵan deiin sarapshylar Qazaqstan aýmaǵynda jumys isteitin reseilik kásipkerlerdiń quqyqtary men mindetteri týraly aqparat bergen bolatyn.
