2026 jylǵy sáýir aiynda Qazaqstan Respýblikasynyń Prezidenti janyndaǵy Qazaqstan strategiialyq zertteýler institýtynyń tapsyrysy boiynsha júrgizilgen áleýmettanýlyq zertteý nátijeleri qazaqstandyqtardyń basym bóligi eldiń qazirgi damý baǵytyn oń baǵalaitynyn kórsetti. Atap aitqanda, saýalnamaǵa qatysqandardyń 84,4%-y elimiz durys baǵytta damyp keledi dep esepteidi, dep habarlaidy dalanews.kz.
Aýmaqtyq bólinis ártúrli eldi meken turǵyndarynyń baǵalaýlarynda joǵary deńgeidegi úilesimdilikti kórsetedi. Qala turǵyndarynyń arasynda respondentterdiń 84%-y eldiń damý baǵytyn oń baǵalasa, aýyl turǵyndary arasynda bul kórsetkish sál joǵary – 85,2%-dy quraidy. Bul turǵylyqty jerine qaramastan, azamattardyń qazirgi baǵytty qabyldaýy uqsas ekenin kórsetedi.
Gender turǵysynan taldaý erler men áielderdiń de joǵary deńgeide oń baǵa beretinin kórsetedi. Sonymen qatar, áielder arasynda bul kórsetkish birshama joǵary – 86,2%-dy qurady, bul erler arasyndaǵy kórsetkishten 4,3%-ǵa artyq.
Jas ereksheligi turǵysynan eń joǵary qoldaý deńgeii jastar arasynda tirkeldi – 89,3%. Bul jastardyń qazirgi saiasi baǵytty anaǵurlym oń qabyldaitynyn kórsetedi.
Satyp alý qabileti artqan saiyn oń baǵalar da aitarlyqtai ósetini baiqalady. Ózderiniń ekonomikalyq jaǵdaiynyń jaqsarǵanyn sezinetin respondentter bul ilgerileýdi qazirgi saiasi baǵytpen bailanystyrýǵa beiim.
Jalpy alǵanda, zertteý nátijeleri qazaqstandyqtardyń saiasi baǵytqa bergen baǵasy negizinen oń sipatqa ie ekenin jáne halyqtyń negizgi áleýmettik-demografiialyq erekshelikterine qaramastan joǵary deńgeide saqtalatynyn kórsetedi.
*Áleýmettik saýalnama QSZI tapsyrysy boiynsha 2026 jylǵy 10 sáýir men 10 mamyr aralyǵynda júrgizildi. Irikteý jiyntyǵynyń kólemi – 8 000 respondent. Saýalnamaǵa 17 oblys pen respýblikalyq mańyzy bar 3 qalalar – Astana, Almaty jáne Shymkent qalalarynan 18 jastan asqan respondentter qatysty.
