Qazaqstanda Seismologiia salasyn damytýdyń 2024-2028 jyldarǵa arnalǵan keshendi jospary qabyldandy, dep habarlaidy Dalanews.kz.
Úkimettiń tiisti qaýlysyna QR premer-ministri Oljas Bektenov qol qoiǵan.
"Qujat elimizdiń seismologiialyq qaýipsizdigin nyǵaitý boiynsha aýqymdy sharalardy iske asyrýdy kózdeidi. Olardyń ishinde monitoringti aitarlyqtai kúsheitý, ǵimarattar men qurylystardyń seismikalyq tózimdiligin qamtamasyz etý, jańa tsifrlyq tehnologiialardy engizý, kadrlardy daiarlaý deńgeiin arttyrý jáne t. b. bar", - delingen habarlamada.
Osylaisha, 15 seismikalyq aýdandastyrý kartasy ázirlenedi, bul elimizdiń seismikalyq qaýipti óńirlerindegi jer silkinisi oshaqtarynyń 70 paiyzyn boljaýǵa múmkindik beredi. Sondai-aq, olar atalǵan aýmaqtardaǵy ǵimarattar men qurylystardy pasporttaýǵa jáne jańa qurylys normalaryn ázirleýge negiz bolady.
"Pasporttaý eń osal qurylys obektilerin anyqtaýǵa múmkindik beredi, olarǵa qatysty birinshi kezekte seismikalyq qaýiptiligin tómendetý sharalary qoldanylady. Onyń ishinde: seismikalyq kúsheitý, qundy jabdyqtardy qorǵaý nemese shyǵarý, maqsatyn ózgertý jáne basqalary bar".
Sonymen qatar 285 seismikalyq stantsiiany ornatý, sondai-aq qolda bar 70 stantsiiany jóndeý jáne jaraqtandyrý kózdelgen.
"Bul Almaty oblysynda jáne elimizdiń basqa da seismoqaýipti óńirlerinde seismikalyq qaýipti sapaly boljaýǵa múmkindik beredi. Óz kezeginde qajetti áreket etý sharalary jedel qabyldanatyn bolady", - delingen habarlamada.
Budan basqa, ǵimarattardyń qurylysy men jumys isteýine baqylaýdy kúsheitý, monitoring ádisterin jaqsartý, seismologiia salasyndaǵy mamandardy zamanaýi jabdyqtarmen jáne tehnikalyq quraldarmen qamtamasyz etý josparlanǵan.
Jalpy alǵanda, Keshendi jospardy iske asyrý nátijesinde seismikalyq qaýipti aýmaqtardaǵy azamattardyń, qurylystar men infraqurylymnyń qorǵalý deńgeii aitarlyqtai kúsheiýi tiis. Sondai-aq, jer silkinisi bolǵan kezde memlekettik organdar men beiindi uiymdar tarapynan den qoiý júiesi jetildiriletin bolady.
