Qazaqstandyq mamandar atom energetikasy jáne jasandy intellekt salasynda “Bolashaq” baǵdarlamasy aiasynda shetelde bilim alý múmkindigine ie bolady. Bul týraly memlekettik keńesshi Erlan Qarin málimdedi, dep habarlaidy Dalanews.kz.
Biyl "Bolashaq" stipendiiasyna konkýrs erejeleri jańartyldy. Úmitkerler úsh kezeńnen turatyn irikteýden ótedi: keshendi testileý, suhbat jáne Respýblikalyq komissiianyń eń joǵary upai jinaǵan qatysýshylardy irikteýi. Sonymen qatar bir kúntizbelik jyl ishinde konkýrsqa qaita qatysý múmkindigi qarastyrylǵan, bul áleýetti úmitkerlerge baǵdarlamada óz múmkindigin synaýǵa qosymsha múmkindik beredi.
Konkýrs qorytyndysy boiynsha 225 qazaqstandyq azamat halyqaralyq «Bolashaq» stipendiiasyn ielendi. Orta eseppen bir orynǵa tórt úmitkerden keldi. Sondai-aq, biyl sheteldik joǵary oqý oryndary men ǵylymi ortalyqtarǵa qoiylatyn talaptar ózgerdi: olar halyqaralyq bedeldi reitingterde úzdik 100 orynǵa enýi kerek. Bul "Bolashaq" stipendiiasy aiasyndaǵy akademiialyq bilim sapasyn arttyrýǵa jol ashady.
Jańa stipendianttardyń 152-si magistratýrada, 16-sy doktorantýrada oqidy, al 57 otandasymyz sheteldik ýniversitetter men ortalyqtarda kásibi taǵylymdamadan ótedi. Sonymen qatar 182 qazaqstandyq álemniń jetekshi ǵylymi jáne zertteý ortalyqtarynda taǵylymdamadan ótýge grant aldy. Irikteý sapasyn arttyrý maqsatynda úmitkerlerge qoiylatyn talaptar kúsheitildi: bedeldi basylymdarda ǵylymi maqalalardyń nemese halyqaralyq patentterdiń bolýy mindetti bolyp sanalady. Ǵylymi taǵylymdama baǵyttary Úkimet janyndaǵy Joǵary ǵylymi-tehnikalyq komissiianyń basymdyqtaryna sáikes úilestirildi.
Otyrysta 2026 jyly kásibi taǵylymdamadan ótýshiler úshin jańa sanat – "Jasandy intellekt júiesin paidalanýshylar" bekitildi. Ekonomikanyń túrli salasyn tsifrlandyrý baǵdarlamasy jasandy intellekt quzyretterin damytý qajettiligin týyndatady, bul ulttyq ekonomikanyń básekege qabilettiligin arttyrý jáne negizgi salalardy damytý úshin mańyzdy dep sanalady.
Sonymen qatar 2026 jyldan bastap magistratýra, doktorantýra jáne taǵylymdama boiynsha atom energetikasy salasyndaǵy mamandardy daiarlaýǵa arnaiy sanat engiziledi. Jyl saiyn bul baǵytqa 20 kvota bólinedi, bul otandyq atom ónerkásibine qajetti bilikti kadrlardy ýaqtyly daiarlaýǵa múmkindik beredi.
Jalpy, jaratylystaný-tehnikalyq baǵyttaǵy "Bolashaq" stipendiialarynyń úlesi 2022 jylǵy 59,2%-dan 2025 jyly 70%-ǵa deiin ósti. Injenerlik-tehnikalyq mamandyqtar boiynsha ǵylymi taǵylymdamalarǵa berilgen stipendiialardyń úlesi 46%-dan 72,4%-ǵa artty.
Otyrys qorytyndysy boiynsha Erlan Qarin "Bolashaq" halyqaralyq stipendiiasyn odan ári iske asyrý jáne jetildirý jóninde naqty tapsyrmalar berdi.
