Qazaqstannyń 17 óńirinen 1100 adam qatysqan saýalnamada 62% respondent ettiń qymbattaýyna bailanysty ony burynǵydai jii satyp almaitynyn aitty, dep habarlaidy Dalanews.kz.
Taǵy 24,5% azamat osyndai sebeppen kókónis pen jemis-jidek tutynýdy azaitqan.
Bul DEMOSCOPE qoǵamdyq pikirdi ekspress-monitoring biýrosy júrgizgen «Qazaqstandaǵy azyq-túlik qaýipsizdigin qabyldaý» zertteýiniń nátijesi.
Zertteý qorytyndysyna sáikes, azamattardyń 74,7%-y sońǵy alty aida azyq-túlik baǵasynyń ósýine alańdaýly. Al 6,9% respondent baǵanyń qymbattaýy olardy múlde mazalamaitynyn aitqan.
Esepte qazaqstandyq otbasylardyń shyǵynynyń jartysynan astamy (50,6%) azyq-túlikke jumsalatyny kórsetilgen.
Saýalnama nátijesi boiynsha:
- 62% – etke,
- 24,5% – kókónis pen jemiske,
- 20,5% – balyqqa,
- 16,9% – sút ónimderine,
- 12,1% – nan men un taǵamdaryna únemdei bastaǵan.
Al 11,2% respondent shujyq ónimderin satyp alýdan bas tartqan, 10,9% tátti taǵamdardy qysqartqan.
Degenmen 24,1% azamat burynǵydai azyq-túlikten únemdemei, úirenshikti taǵamdaryn satyp alyp júr.
Qyzyǵy, baǵanyń ósýine qaramastan, qazaqstandyqtar azyq-túlik qaýipsizdigi deńgeiin - sapa, qoljetimdilik jáne baǵa turǵysynan - áli de oń baǵalap otyr.
Respondentterden bul deńgeidi 5 baldyq shkala boiynsha baǵalaý suralǵan: 5 – óte joǵary, 1 – óte tómen. Nátijesinde 45,1% azamat azyq-túlik júiesiniń turaqtylyǵyn joǵary baǵalaǵan (onyń ishinde 25% – óte joǵary, 20,1% – joǵary). Al 19,6% syn kózben qaraidy: 11,3% – óte tómen, 8,3% – tómen dep esepteidi. 35,3% ortasha deńgeide dep baǵalaǵan.
Taǵy bir qyzyqty tujyrym - 64,3% azamat aldaǵy bes jylda Qazaqstan tolyq azyq-túlik ózin-ózi qamtamasyz etý deńgeiine jetedi dep senedi. Tek 16,7% bul pikirge kúmánmen qaraidy.
Sonymen qatar, respondentterdiń 53,7%-y qazirgi tańda otandyq ónim importtyq taýarlardan qymbat ekenin atap ótken.
Saýalnama telefon arqyly júrgizilgen. Qatysýshylardyń 46,9%-y er adamdar, 53,1%-y áielder. 62% qazaq tilinde, 38% orys tilinde jaýap bergen. Respondentterdiń 77,8%-y qazaq, 12,1%-y orys jáne 9,7%-y ózge ult ókilderi. 65,9% qalada, 33,4% aýylda turady.
