Qazaqstandyq kásipkerlerdi sotqa bergen Álıa Nazarbaeva jeńilip qaldy

Kórkem Aldabergenova 10 maý. 2024 11:51 4135

Kásipkerlerdi sotqa bergen Álıa Nazarbaeva jeńilip qaldy, - dep habarlaıdy Dalanews.kz.
 
Álıa Nazarbaeva óziniń advokattary arqyly sotqa aryz jazǵan. 
 
"Álıa Nazarbaev advokattary arqyly kásipker Nurlan Bımýrzın men Medgat Qalıev jala japty dep aryz jazǵan. Ótken aptada sot qylmys quramynyń joq bolýyna baılanysty isti toqtatý týraly sheshim shyǵardy", - deıdi kásipker Nurlan Bımýrzın Kaztag-qa bergen suhbatynda.  
 
Aıta keteıik, bıyl 28 aqpanda "TPK Asia" JSHS quryltaıshysy Nurlan Bımýrzın seriktesi Megdat Qalıev ekeýi Nazarbaeva men Rogovanyń reıderlik shabýylynyń qurbany bolǵanyn málimdegen bolatyn.

Bımýrzınniń aıtýynsha, 2003 jyly Álıa Nazarbaeva óz yqpalyn paıdalana otyryp, quny 170 mıllıon dollar bolatyn (2003 jylǵy esep boıynsha - esk.) jeti munaı bazasy men 96 janarmaı quıý beketin tartyp alǵan.

"Basynda qarjy polısıasy qysym kórsetti. Sosyn Álıa Nazarbaevanyń ókili kelip, bizge qorǵan bolýǵa shamalary jetetinin jetkizdi. Ol úshin bıznestiń 50 paıyzy berilýi keregin aıtty. Bir jyldan keıin Álıa Nazarbaeva endi qalǵan úlesti de berý keregin eskertti. Sol jyly meniń ákemdi olar alyp ketip, Nazarbaevanyń keńsesine aparǵan. Ákemmen sóılesken. Eki ulyń úshin alańdasań, bıznesińdi ber degen. Amal joq, ákem kelisedi. 

Kelesi kúni men bardym. Ol jerde Álıa bolǵan joq, biraq onyń ornyna Rogova boldy. Men sol jerde úlesimdi bar joǵy 18 125 teńgege satýǵa májbúr boldym", - deıdi Nurlan Bımýrzın.

14 naýryzda Bas prokýratýra Nazarbaevanyń reıderlik áreketi týraly aryzyn tirkegenin habarlady. Alaıda 5 sáýirde polısıa eks-prezıdenttiń kenje qyzyna qatysty qylmystyq is qozǵaýdan bas tartqany belgili boldy.

Buǵan deıin kásipker Nurlan Bımýrzın Álıa Nazarbaevanyń reıderlik áreketteri týraly 20 jyl boıy nege aıtpaǵanyn túsindirgen bolatyn. 

Bımýrzınniń sózinshe,20 jyl boıy bul is týraly jarıa etýge eshkimniń kúshi jetpegen. 

"Ony kim jarıa qylar edi? Kerek adamdar bul jaıly bildi. 21 jyl buryn jáne 2019 jylǵa deıin bizge muny jarıa etýge kim ruqsat beretin edi? Gazetterge jarıalaǵan kúnniń ózinde táýligine 25 saǵat, aptasyna 8 kún otbasymdy kúzetip júrýim kerek bolar edi. Qazir biz ádildik úshin kúresip júrmiz. Kóp adam biz ne úshin qylmystyq is qozǵalǵanyn talap etip júrgenimizdi túsinbeı jatady. Zań boıynsha aryz jazyldy ma – qylmystyq is mindetti túrde qozǵalýy kerek. Tergeý júrýi kerek. Barlyq adam tergeýden ótýi kerek. Tergeý tolyq ótýi úshin Álıadan da jaýap alynýy kerek. Biraq oǵan eshkimniń áli jetpeıdi. Sondyqtan osyndaı jaǵdaı bolyp otyr", - deıdi Nurlan Bımýrzın Elmedia-ǵa bergen suhbatynda.

Sonymen qatar, Bımýrzın bıznes ımperıasynyń negizin qalaǵan ákesi týraly aıtty.

"Ony atyp óltirip ketti. Menen kóp adam "bul  jaǵdaıǵa kim kináli dep oılaısyń?" dep suraıdy. Eshkimdi kinálamaımyn, buǵan bolǵan jaıt qana kináli. Eger bizdiń bıznesimizdi tartyp almasa, mundaı jaǵdaı bolmas edi", - deıdi kásipker.

Nurlan Bımýrzın qazirgi tańda Álıa Nazarbaevanyń reıderlik áreketine qatysty qylmystyq is qozǵaý amaldary qalaı júrip jatqanyn aıtty. Onyń sózinshe, Bas prokýratýra bul isti Almatynyń ishki ister basqarmasyna "laqtyryp" jibergen.


Usynylǵan
Sońǵy jańalyqtar