Qazaqstandyq advokattar qylmystyq qýdalaý men qysym kórsetilip jatqanyn aityp, bul áreketterdiń artynda Qyrǵyzstanda izdeýde júrgen biznesmen Iasynjan Tairov tur degen málimdeme jasady, dep habarlaidy Dalanews.kz KazTAG-qa siltep.
Advokat Elmira Appasovanyń aitýynsha, advokattyq qyzmetke zańsyz aralasý Qazaqstan zańnamasy boiynsha jaýapkershilikke ákep soǵatynyna qaramastan, quqyq qorǵaý organdary bul talaptardy elemei otyr.
"Biz Iasynjan Tairovpen kezdesip, onyń ne sebepti shaǵym túsirgenin anyqtadyq. Ol bizdi buryn tanymasa da, múlkimizdi satqyzyp, 1 million dollar talap etken. Bul reiderlik áreketke onyń ózi men baýyry Almaz Ibragimovtyń yqpalymen tergeýshiler kómektesip jatyr", - dedi Appasova Almatydaǵy Ulttyq baspasóz klýbynda ótken baspasóz máslihatynda.
Kelisimnen keiingi qysym
Advokattardyń aitýynsha, janjal Astana advokattar alqasynyń múshesi Lázzat Janseitova men onyń klienti Iasynjan Tairov arasyndaǵy kelisimnen bastalǵan. Bastapqyda kásipker advokatpen resmi kelisimshart jasasyp, qyzmetine aqy tólegen. Alaida kóp uzamai advokatqa qarsy negizsiz talaptar qoia bastaǵan.
"Tairov Qyrǵyzstanda izdeýde júrgen adam. Beiresmi derekkózderge qaraǵanda, ol sol eldegi belgili qylmystyq toptardyń múshesi bolǵan. Alaida bizdiń kóshi-qon qyzmetteri bul derekterdi teksermesten, oǵan Qazaqstan azamattyǵyn berip otyr", - dedi quqyq qorǵaýshy, Prezident janyndaǵy áielder isteri jónindegi ulttyq komissiia múshesi Aiman Omarova.
Onyń aitýynsha, keiin advokat Janseitova atalǵan talaptar boiynsha quqyq qorǵaý organdaryna aryz túsirgenimen, bul shaǵym tirkelmegen.
Advokattardy jaýapqa tartý áreketi
Advokattar kásipker men onyń tanystary arasynda bolǵan aqsha almasý advokatqa esh qatysy joǵyn aitqanymen, quqyq qorǵaý organdary Janseitovany alaiaqtyq jasady dep aiyptap otyr.
"Tergeýshiler Amantai men Abjanov advokattyń keńsesin tintýge sanktsiia alyp, onyń advokat ekenin kórsetpegen. Bul - zań buzýshylyq", - dedi Omarova.
Advokattardyń málimdeýinshe, 8 mamyrda Janseitovanyń páteri men keńsesinde tintý júrgizilgen. Quqyq qorǵaýshylar páterge kirmes buryn esik aldynda belgisiz untaq salynǵan paket tastamaq bolǵan. Janseitova kúmán týdyrǵan adamdy syrtqa shyǵaryp jibergen.
Advokattarǵa jasalǵan qysym
Baspasóz máslihatyna qatysqan zańgerler advokattyń áriptesteri men týystaryna da qysym kórsetilgenin aitty. Keńseler zańsyz tintilip, isterge qatysy joq qujattar alynyp, advokattyq qupiia buzylǵan.
Advokattarǵa QR Qylmystyq kodeksiniń 407-baby boiynsha - «dosýdebtik tergeýge kedergi keltirý» deregimen is qozǵalǵan.
Memleket tarapynan qorǵaý joq
Advokat Lázzat Janseitova zańsyz qýdalaýǵa qatysty shaǵym túsirip, Respýblikalyq advokattar alqasynyń kásibi quqyqtardy qorǵaý komissiiasy tekseris júrgizgen. Komissiia advokattardyń quqyqtary óreskel buzylǵanyn anyqtady.
Komissiianyń qorytyndysynda tergeý sýdiasynyń sanktsiiasysyz advokat keńsesin tintý zańǵa qaishy ekeni, advokattyq qupiiany qorǵaý normalary buzylǵany, politsiia tarapynan ókilettilikti asyra paidalaný men zańdy qyzmetke kedergi keltirý derekteri oryn alǵany aitylǵan.
"Quqyq qorǵaý organdarynyń bul áreketterinen keiin biz, advokattar, memlekettiń zańdy qorǵaýynan tys qalǵanymyzdy túsindik. Búginde bizdiń zańdy qyzmetimizge kedergi keltirilip jatyr. Biz quqyq qorǵaý júiesiniń aldynda dármensiz qaldyq", - dedi Astana advokattar alqasynyń múshesi Arman Janseitov.
