Qazaqstandyq segiz bloger óz erkimen 1 milliard teńgeden astam kirisin deklaratsiialady, dep habarlaidy Dalanews.kz KTK aransyna silteme jasap.
Buǵan dál ne sebepti barǵany belgisiz. Bul sheshimge áleýmettik jelide taraǵan, milliondaǵan salyq tóleýge mindettelgen blogerlerdiń tizimi yqpal etti me, joq pa – naqty derek joq.
Kirister komitetiniń málimetinshe, atalǵan blogerlerdiń biýdjetke tólegen jalpy salyǵy 70 million teńgeden asady. Degenmen salyq organdary olardyń aty-jónin jariia etpeitinin jáne jeke derekterdi taratpaitynyn málimdedi.
Bul rette Ishki ister ministrligi (IIM) áleýmettik jelide taraǵan blogerler tiziminiń ras-ótirigine qatysty óz ustanymyn bildirdi.
IIM málimetinshe, boryshker blogerler týraly aqparattyń taralý deregi tirkelip, is Astana qalasynyń politsiia departamentine jiberilgen.
"Áleýmettik jelilerde blogerler týraly derekteri bar tizimdi taratý faktisi Ishki ister ministrliginiń aqparatty esepke alý kitabyna tirkeldi. Materialdy qaraý barysynda bul tizimniń shynaiylyǵy tekseriledi", – delingen vedomstvo habarlamasynda.
Eske salaiyq, buǵan deiin salyq tólemei kelgen blogergerge qatysty aqparat taraǵan edi. Qazaqstandyq blogerlerge qatysty salyqtyq tekserýlerdiń ne sebepti bastalǵanyn Memlekettik kirister komiteti (MKK) túsindirdi.MKK jeke tulǵalardyń kiristerin ákimshilendirý basqarmasynyń basshysy Dina Qusaiynovanyń TengriTV YouTube arnasyna bergen suhbatynda aitýynsha, salyq organdaryna qazaqstandyqtardan birneshe shaǵym túsken.
«Bul jumysty kóptegen azamattardyń shaǵymdary negizinde bastadyq. Bizge azamattardan blogerlerdiń sán-saltanatqa toly ómir súretini, alaida salyq tólemeitini týraly ótinishter kelip tústi. «Olardy tekserińizder, olar qymbat kólikterde júredi, elitalyq páterlerde turady, záýlim úiler satyp alady» degen suraqtar týyndady. Árine, halyq olardyń qansha salyq tóleitinin bilgisi keledi», – dedi Dina Qusaiynova.
Onyń aitýynsha, blogerlerge salyqtyq habarlamalar 2025 jyldyń aqpanynda jiberilgen jáne ol 2022-2023 jyldarǵa júrgizilgen taldaýǵa negizdelgen.
«Ol ýaqytta blogerler tabys taýyp otyrdy. Keibireýleri salyq deklaratsiiasyn tapsyrsa, keibireýleri múlde tapsyrmaǵan. Al keibir blogerler kiristerin «nól» dep kórsetken. Sondyqtan biz taldaý júrgizip, sáikessizdikterdi anyqtadyq», – dep túsindirdi MKK ókili.
Kóptegen blogerler jinaǵan qarajattarynyń qaiyrymdylyqqa, týǵan kúnderge nemese jaqyndaryna aýdarylǵanyn alǵa tartqan. Bul másele boiynsha Dina Qusaiynova naqty túsinikteme berdi.
«Qaiyrymdylyq týraly zań bar. Qaiyrymdylyq kómek retinde alynǵan qarajat týraly ýákiletti organdarǵa esep berý kerek. Qashan, kimnen, qandai soma alynǵany kórsetilýi tiis. Eger osyndai esepter usynylsa, olar mindetti túrde eskeriledi.
Sonymen qatar, basqa da kiris túrleri bar. «Qaiyrymdylyq kómek», «demeýshilik kómek» degen uǵymdar bar. Munyń bári de kiris retinde qaralyp, salyq kodeksine sáikes rettelýi tiis. Eger bul buryn jasalmasa, blogerler qosymsha salyq deklaratsiiasyn tapsyryp, barlyq kiristerin kórsetýine bolady. Olardyń habarlamaǵa jaýap berýine 30 jumys kúni, iaǵni shamamen 1,5 ai ýaqyty bar»*, – dep túsindirdi basqarma basshysy.
Qazaqstandyq blogerlerdiń keibiri bul salyqtyq tekserýlerdi «kórsetilgen qysym» dep ataǵan edi. Buǵan jaýap retinde Dina Qusaiynova tekserýlerdiń maqsaty jazalaý emes, memlekettik biýdjetti tolyqtyrý ekenin atap ótti.
«Bul sóz tym óreskel estiledi. Jalpy, bizdiń basty mindetimiz – memlekettik biýdjetke túsetin kiristi arttyrý jáne barlyq jeke tulǵalardyń salyq tóleýin qamtamasyz etý. Biz úshin adam bloger me, jýrnalist pe, kásipker me – mańyzdy emes. Barlyǵy zańǵa sáikes salyq tóleýge mindetti», – dep atap ótti ol.
Sonymen qatar, ol bul tekserýler «joǵarydan túsken tapsyrma» degen pikirlerge jaýap berdi.
«Habarlamalar tek aqpanda ǵana jiberilgen joq. Buǵan deiin de osyndai eskertýler bolǵan. Keibir blogerler únsiz qosymsha deklaratsiia tapsyrdy jáne salyqtaryn tóledi. Al keibireýleri áleýmettik jelide bul protsesti durys emes dep esepteitinin aityp jatyr. Eger bir nársege kelispese, bizge dálelderimen birge túsinikteme usynsyn. Barlyq kiristerin naqtylap, salyq organyna qajetti aqparat bersin.
