«Eýraziia álemi» pikir saiys klýbynda «Eýraziia keńistigindegi áleýmettik saiasat: kún tártibindegi máseleler, reformalar jáne áriptestik» máselerin talqylaǵan sarapshylar osy taraptaǵy oilaryn ortaǵa saldy.
Saiasattanýshy Zamir Karajanovtyń aitýynsha, áleýmettik saiasatty ár memleket óz betinshe júrgizgeni jón.
«Eldegi kedeishilik men jumyssyzdyq deńgeii neǵurlym tómen bolsa, soǵurlym sol memlekettiń áleýmettik saiasatty durys júrgizýde dep aitýǵa olady. Eger el azamattarynyń jalaqysy joǵary bolsa, olar memlekettiń kómegine de muhtaj bolmaidy. Al joǵary jalaqy kóp jaǵdaida durys júrgizilgen ekonomikalyq saiasattyń jemisi, – deidi ol.
Al jýrnalist Sergei Kozlovtyń pikirinshe, Eýraziialyq odaq aiasyndaǵy elder áli kúnge deiin keńestik áleýmettik júieniń tutqynynan shyǵa almai keledi.
«Bul sol kezdegi ideologiianyń ózegi edi. Áleýmettik saiasatty naryqqa, qazirgi turmysqa qarai beiimdeitin kez jetti. Kapitalizmnen qasha almaimyz.
Halyqtyń óziniń áleýmettik quqyqtaryn qorǵap úiretý qajet. Halyq muny bilmeidi. Bilmegendikten, kúrespeidi», – deidi ol.
Óz kezegindegi Qazaqstanda shekaralyq áriptestik qaýymdastyǵynyń ókili Marat Shibutov áleýmettik saiasat adam quqyǵynyń qorǵalýymen tyǵyz bailanysty ekenin aitty.
Sizdiń quqyńyz qanshalyqty qorǵalady mysalǵa? Balalardyń, áielderdiń, zeinetkerlerdiń, múgedekterdiń, emdelýshilerdiń, bilim alýshylardyń quqy qanshalyqty qorǵalyp jatyr? Másele osyda. Bul salany keshendi túrde qarastyrý kerek. Myqty matematikterdi, bilim jastardy, talanttylardy, daryndylardy, tabys taba alatyn adamdardy qanshalyqty qorǵai alady Úkimet, olar bul elde ózin jaily sezine me? Óz múmkindigin tolyq pash ete ala ma, joq pa? Áleýmettik saiasat degenimiz osy» deidi ol.
Jiyndy túiindegen saiasattanýshy Andrei Chebotarevtyń aitýynsha, Eýraziialyq odaq keńistigindegi ortaq áleýmettik saiasat júrgizý múmkin emes. «Áleýmettik sala turmaq, ekonomikalyq áriptestiktiń ózi aqsap turǵan joq pa? Eýraziialyq odaqtyń qurylǵanyna úsh jyl boldy, biraq, ortaq ekonomikalyq naryq áli kúnge tolyq qurylǵan joq.
Odaq kelisimsharty aiasynda qabyldanǵan erkin taýar almasý, kapital almasý isi 100 paiyzǵa jumys istemeidi. Memlekettik deńgeide buǵan kedergi keltiretin kóptegen faktorlar bar. Al mundai jaǵdaida ortaq áleýmettik saiasat qurý týraly sóz qozǵaýdyń ózi qisynsyz» deidi ol.
