Qazaqstanda ózin-ózi jumyspen qamtyǵan azamattardyń quqyqtyq mártebesin aiqyndaý máselesi kelesi jyly qaita qaralady. Bul týraly Premer-ministrdiń orynbasary – ulttyq ekonomika ministri Serik Jumanǵarinniń tóraǵalyǵymen ótken Salyq kodeksin engizý jónindegi Jobalyq keńestiń otyrysynda málim boldy, dep habarlaidy dalanews.kz.
Ulttyq ekonomika ministrliginiń málimetinshe, jańa Salyq kodeksinde ózin-ózi jumyspen qamtyǵandar ekonomikalyq belsendi azamattardyń jańa sanaty retinde engizilgen. Olar jeke kásipker retinde tirkelmei-aq qyzmet kórsetetin nemese jumys oryndaityn, jaldamaly jumysshy tartpaityn ári salyq zańnamasynda belgilengen talaptarǵa sai keletin jeke tulǵalar.
"Qoldanystaǵy zańnama ózin-ózi jumyspen qamtyǵandardy kásipkerlik sýbektilerine jatqyzbaidy. Sonyń saldarynan shaǵyn jáne orta bizneske qatysty resmi statistikada bul sanat esepke alynbaidy. Bul Salyq, Kásipkerlik jáne Áleýmettik kodekster arasynda quqyqtyq qaishylyq týyndatyp otyr", - dep habarlady ministrlik.
Jańa Salyq kodeksine sáikes, arnaiy salyq rejimin aiyna tabysy 300 AEK-ten aspaityn, jaldamaly qyzmetker ustamaityn jáne ruqsat etilgen qyzmet túrlerimen ainalysatyn jeke tulǵalar paidalana alady. Bul rejim boiynsha olar tek 4 paiyz kóleminde áleýmettik tólemder tóleidi.
Ministrlik deregine sáikes, jyl basynan beri 688,8 myń ózin-ózi jumyspen qamtyǵan azamat tirkelgen. Onyń 597 myńy nemese 87 paiyzy Yandex, inDrive, Wolt jáne basqa da tsifrlyq platformalar arqyly eńbek etedi. Al 91,5 myń adam qyzmetin óz betinshe júrgizedi.
"Tirkelgenderdiń 84,2 myńy buryn jeke kásipker retinde esepte turǵan. Al 546,4 myń azamat buǵan deiin kásipker retinde múlde tirkelmegen. Osylaisha, jarty millionnan astam adam alǵash ret resmi jumyspen qamtý jáne salyq júiesine qosyldy", - delingen ministrlik aqparatynda.
Otyrys barysynda qatysýshylar ózin-ózi jumyspen qamtýdy derbes ekonomikalyq qyzmet retinde taný, kásipkerlikke ótýdiń aralyq kezeńi nemese jumyspen qamtýdyń erekshe sanaty retinde belgileý máselesin talqylady. Bul sheshim aldaǵy ýaqytta Kásipkerlik jáne Áleýmettik kodeksterge engiziletin ózgeristerge áser etetini aityldy.
"Ózin-ózi jumyspen qamtyǵandardyń mártebesin Áleýmettik jáne Kásipkerlik kodeksterde bekitýge qatysty ózgerister qazirgi túzetýler toptamasyna engizilmeidi. Bul máselege jańa salyq rejiminiń qoldanylý tájiribesi qalyptasqannan keiin, kelesi jyly qaita oralý josparlanyp otyr", - dep málimdedi Ulttyq ekonomika ministrligi.
Sondai-aq otyrysta ónimdi bólý týraly kelisimder aiasynda jumys isteitin jer qoinaýyn paidalanýshylar úshin elektr energiiasynyń teńgerimdeýshi naryǵyndaǵy operatsiialarǵa salyq salý máselesi qaraldy. Qatysýshylar bul baǵytta da zańnamalyq retteýdi jetildirý qajet degen ortaq pikirge keldi.
