Qazaqstan úkimeti biýdjet qarajatyn únemdeý maqsatynda memlekettik organdar men ulttyq kompaniialarǵa 2023 jylǵa deiin avtokólik jáne jihaz satyp alýǵa tyiym saldy. Bul týraly respýblikanyń qarjy ministrligi habarlady.
2020 jyly jeńil avtokólik jáne keńse jihazyn alýǵa josparlanǵan 532,8 mlrd teńge ($1,2 mlrd) koronavirýspen kúresýge, kásipkerler men azamattardy qoldaýǵa aýdarylady.
Qarjy ministrligi úsh jylda 6,4 trln teńge ($15,6 mlrd) únemdeýdi kózdep otyr. Qazir sheneýnikter jańa biýdjet jasap jatyr.
Ortalyq Aziianyń barlyq elderi kóktemnen beri ekonomikalyq daǵdarysty bastan ótkerip jatyr. Buǵan koronavirýs pandemiiasy men karantin sebep boldy. Ekonomister koronavirýs saldarynan týyndaǵan ekonomikalyq problemalardy Ekinshi dúniejúzilik soǵystan keiingi eń kúrdeli daǵdarys dep boljaidy.
Qazaqstandaǵy ekonomikalyq jaǵdaidyń aýyrlyǵy eń áýeli munaidyń álemdegi baǵasynyń tómendeýine bailanysty bolyp otyr. Koronavirýs pandemiiasyna bailanysty munaiǵa suranys kúrt tómendedi. Biýdjetti toltyrý úshin Qazaqstan biligi syrtqy naryqtan 3 mlrd dollar qaryz salyp, Ulttyq qordaǵy aqshany qoldanýdy kózdep otyr.
Halyqaralyq valiýta qory biyl Qazaqstannyń ekonomikasy 2,5 paiyzǵa qysqaryp, jumyssyzdyq deńgeii 7,8 paiyzǵa artady dep boljady.
