Qazaqstanda koronavirýs juqqan, biraq aýrý belgileri joq adamdar sany 1044-ke jetken. Bul týraly 7 maýsymda tańerteń densaýlyq saqtaý ministrligi habarlady.
Vedomstvo 3 maýsymnan bastap simptomy joq naýqastardy negizgi statistikaǵa engizbei, bólek esepteitinin habarlaǵan edi.
6 maýsymda elde "aýrý belgileri" baiqalmaǵan osyndai 357 adam anyqtalǵan. Bul "aýrý belgileri bar naýqastardan" shamamen eki esege kóp. Jeksenbi kúni ministrlik ótken táýlikte 183 naýqas anyqtaldy dep habarlaǵan.
Ministrliktiń málimetinshe, "aýrý belgileri" baiqalmaǵan adamdar tómendegi oblys jáne qalalardan anyqtalǵan:
- Nur-Sultan —141,
- Almaty — 95,
- Shymkent — 131,
- Aqmola oblysy — 13,
- Aqtóbe oblysy — 17,
- Almaty oblysy — 73,
- Atyraý oblysy — 65,
- Shyǵys Qazaqstan oblysy — 48,
- Jambyl oblysy — 16,
- Batys Qazaqstan oblysy — 136,
- Qaraǵandy oblysy — 102,
- Qostanai oblysy — 5,
- Qyzylorda oblysy — 48,
- Mańǵystaý oblysy — 71,
- Pavlodar oblysy — 10,
- Soltústik Qazaqstan oblysy — 40,
- Túrkistan oblysy — 33.
Sáýir aiynyń sońynda indet órship, koronavirýstan qaitys bolǵandar sany artqan shaqta densaýlyq saqtaý ministrligi koronavirýspen bailanysty adam ólimi statistikasyn da virýstan qaitys bolǵandar jáne ólimine koronavirýs sebep bolmaǵandar dep eki bólek júrgize bastaǵan. Biraq sońǵysynyń statistikasy kópke deiin aitylmai kelgen.
Sońǵy málimet boiynsha, Qazaqstanda 12 694 adamnan koronavirýs tabylǵan. Buǵan qosa, koronavirýs juqqan, biraq simptomy joq 1044 adam bar. 7135 adam jazylǵan. 53 adam qaitys bolǵan. Odan bólek, ministrliktiń aitýynsha, koronavirýs juqqan 37 adamnyń óliminiń basty sebebi COVID-19 emes.
