Úkimette QR Premer-ministriniń orynbasary – ulttyq ekonomika ministri Serik Jumanǵarinniń tóraǵalyǵymen ekonomikalyq ósýdi qamtamasyz etý jónindegi shtab otyrysy ótti. Onda jeńil ónerkásipti damytý máselesi qaraldy, dep habarlaidy Dalanews.kz.
Talqylaýǵa salalyq qaýymdastyqtardyń, onyń ishinde «Qaz Textile Industry» jeńil ónerkásip kásiporyndarynyń ulttyq birlestigi» ózin-ózi retteitin uiymynyń jáne «Jeńil ónerkásip kásiporyndarynyń ózin-ózi retteitin uiymy» ZTB jáne salanyń iri kásiporyndarynyń, onyń ishinde «AZALA Group» MK, «Qazaq Tigin Fabrikasy» JShS, «Qazjeńilónerkásip-Almaty» JShS, «Global-Arnaiykiim» JShS, «TarazTeriAiaqkiim» JShS tóraǵalary jáne basqalar qatysty.
Ónerkásip jáne qurylys ministrliginiń málimetinshe, sońǵy bes jylda jeńil ónerkásip turaqty damýdy kórsetip keledi. 2025 jyldyń qorytyndysy boiynsha óndiris kólemi NKI-niń 3%-ǵa ósý josparymen 13,2%-ǵa ósip, 260 mlrd teńgege jetti. Óńdeý ónerkásibiniń qurylymyndaǵy jeńil ónerkásiptiń úlesi – 0,8%. Aita ketsek, jeńil ónerkásip qurylymynda 60%-dan astam toqyma óndirisi, 32% – kiim óndirisi jáne 6,5% aiaq kiim men bylǵarydan jasalǵan buiym óndiriledi. Kásiporyndardyń 97%-dan astamy shaǵyn biznes sýbektileri.
Jeńil ónerkásipti damytý maqta men teri óńdeýdi tereńdetý, sintetikalyq talshyq óndirisin keńeitý jáne qosylǵan quny joǵary ónim shyǵarýdy ulǵaitý arqyly josparlanýda.
2025 jyly elimizde maqtanyń rekordtyq kólemi, 466 myń tonna jinaldy. 116,1 myń tonna maqta talshyǵy, 500 tonna iirilgen jip, 5,2 mln sharshy metr mata jáne 28,6 mln birlik daiyn toqyma buiymy óndirildi.
Mysal retinde, ónerkásip jáne qurylys vitse-ministri Oljas Saparbekov bir tonna maqta talshyǵyn qaita óńdeý 1 650 birlikke deiin daiyn toqyma ónimir shyǵarýǵa múmkindik beretinin atap ótti. Shikizatty tolyq qaita óńdeýdi qamtamasyz ete otyryp, yqtimal qosylǵan qun $1,67 mlrd-qa jetip, sondai-aq 5 myńǵa deiin jumys ornyn qurýǵa yqpal etýi múmkin.
Salada «KazFeltec» oqshaýlaý óndirisin, Talshyqteks toqylǵan polipropilen geokenep óndirisin jáne Túrkistan toqyma maqta-mata iirilgen jip óndirisin qosqanda, ortamerzimdik perspektivaǵa negiz bolatyn jobalar iske asyrylýda.
Sonymen qatar oń dinamikaǵa qaramastan, otyrysqa qatysýshylar keshendi sheshýdi talap etetin birqatar júieli máseleni belgiledi. Olar shikizat bazasyn damytýǵa, óndiristi jańǵyrtýǵa, rettelip satyp alý tetigin jetildirýge jáne qarjylyq qoldaý sharalaryn keńeitýge qatysty.
Sala kásiporyndary damýdyń boljamdy jaǵdaiyn qalyptastyrý kezinde óndiristi keńeitýge jáne jańa jumys oryndaryn qurýǵa daiyn ekendigin rastady.
Belgilengen mindetterdi eskere otyryp, biznes-qoǵamdastyq pen salalyq qaýymdastyqtardyń qatysýymen jeńil ónerkásipti damytýdyń keshendi baǵdarlamasyn ázirleý týraly sheshim qabyldandy. Júielik qujattyń qajettiligi salanyń oń dinamikasyna da, onyń odan ári ósý áleýetine de bailanysty.
«Jeńil ónerkásip biz úshin halyqty jumyspen qamtý turǵysynan óte mańyzdy. Mysaly, Túrkistan oblysynda, elimizdiń eń kóp qonystanǵan oblysynda jeńil ónerkásip kásiporyndarynyń eń kóp sany bar. Olardyń odan ári damýymen jergilikti halyqty jumys oryndarymen jáne laiyqty jalaqymen qamtamasyz etý múmkindigi bar. Ónerkásip jáne qurylys ministrligi biznespen birlesip, jeńil ónerkásipti damytý baǵdarlamasyn ázirleýdi bastaýy qajet. Qujatta bazalyq kásiporyndar, olardyń aǵymdaǵy kórsetkishteri men maqsatty baǵdarlary anyqtalýy kerek. Qarsy mindettemeler, eń aldymen, jergilikti turǵyndardy jumyspen qamtý jáne óndiristi ulǵaitý», — dep atap ótti Serik Jumanǵarin.
