Qaitarylǵan aktivterdiń 4 mlrd teńgeden astamy Qyzylorda oblysyndaǵy sýmen jabdyqtaý júieleriniń qurylysyn aiaqtaýǵa bólindi, dep habarlaidy Dalanews.kz.
Qyzylorda oblysynyń Aral aýdanynda sýmen jabdyqtaý júiesin salýǵa jáne jańǵyrtýǵa Arnaýly memlekettik qordan shamamen 4,2 mlrd teńge bólý týraly sheshim qabyldandy.
3 myńnan astam halqy bar Toqabai jáne Abai aýyldaryn ortalyqtandyrylǵan aýyz sýmen qamtamasyz etý maqsatynda Aral–Sarybulaq toptyq sý qubyryna qosylatyn Aral–Toqabai–Abai magistrali tarmaǵynyń qurylysy júrgizilýde. Jobanyń iske asyrylýy 2021 jyly bastalǵan. Ony aiaqtaý úshin qosymsha 3,7 mlrd teńge qajet. Qarjy bólý týraly sheshim qabyldandy. Nysandy 2025 jyldyń sońyna deiin paidalanýǵa berý josparlanyp otyr.
Shamamen 400 turǵyny bar Aqbasty aýylynda Aral–Sarybulaq toptyq sý qubyryna qosylatyn Qosman–Aqbasty magistrali tarmaǵynyń qurylysy aiaqtalýǵa jaqyn. Jobanyń quny – shamamen 2,4 mlrd teńge, onyń 1,8 mlrd teńgesi igerilgen. Qalǵan 524 mln teńgesi Arnaýly memlekettik qordan bólindi. Nysandy biyl iske qosý josparlanýda.
Osy jobalardy iske asyrý sapaly sýǵa tikelei qol jetkizýdi qamtamasyz ete otyryp, jańa ekonomikalyq múmkindikterge jol ashady, aýyl turǵyndarynyń turmys sapasyn edáýir jaqsartýǵa jaǵdai týǵyzady.
Sýmen jabdyqtaý júiesin salý jáne jańǵyrtý Úkimet jumysynyń mańyzdy basym mindetteriniń biri bolyp sanalatynyn atap ótý qajet. Is-sharalar Memleket basshysynyń qalalar men aýyldardy aýyz sýmen 100% qamtý jónindegi tapsyrmasyn oryndaý sheńberinde júrgizilýde.
