Buǵan deiingi jazǵan maqalamyzda Qazaq halqy úshin «Aqorda» sóziniń mańyzy zor ekenin jazǵanbyz. Sonaý kóne dáýirlerde Qazaq handyǵynyń irge tasyn qalǵan handarymyz qazirgi tilmen aitsaq, ózderiniń rezidentsiiasyn «Aqorda» dep ataǵanyn tarihtan bilemiz. Osy úrdisti ary qarai jalǵaǵan Tuńǵysh Prezidentimiz Nursultan Nazarbaev Astana tórinde salǵan rezidentsiiasyn «Aqorda» dep at berip, aidar taqty. Qazaq memlekettiliginiń tamasha tarihi sabaqtastyǵy bar ekenin barsha álemge pash etti.
Ár qazaq «Aqorda» ataýyna qasiet qonǵan, kieli sóz dep biledi. Sondyqtan keibir kásipkerler meiramhanalary men bazarlaryn «Aqorda» dep atap osy bir aiaýly ataýdyń mánin qashyrǵanyn ózderi de ańǵarmai qalǵan siiaqty.
Ainalamyzda osyndai jaisyz jaittar oryn alǵannan keiin tynysh jata almadyq. Qolymyzǵa qalam alyp, maqala jazyp, bilik basynda otyrǵandardyń namysyn qashylaýǵa týra keldi.
[caption id="attachment_33321" align="aligncenter" width="1032"]
Almatydaǵy aty "Baqorda" dep aýystyrylǵan bazardyń syrtqy kórinisi[/caption]
Óz maqalamyzda irgemizdegi orystar Resei memleketiniń ainymas nyshanyna ainalǵan «Kreml» ataýymen bazardyń atyn atamaitynyn jazdyq. Sol siiaqty demokratiianyń altyn dińgegine ainalǵan Amerikaǵa barǵan adam «Kapitoliiin» degen qonaqúi nemese meiramhanany eshkimniń kózi shalmaitynyn da aitqanbyz.
Al biz bolsaq, qasietti «Aqorda» sóziniń mánin túsinbei bazar men meiramhanaǵa qoiýdy ádetke ainaldyrdyq. Áiteýir osy bir bazynamyz joǵaryda otyrǵan shendilerdiń qulaǵyna jetip, Almatydaǵy jańadan ashylǵan «Aqorda» bazarynyń aýtaýy «Baqorda» bolyp ózgertilipti.
Aitpaqshy, bizdiń bazar ashqan kásipkerlerimiz naǵyz pragmatik jandar bolyp shyqty. Bazardyń ataýyn ózgertýde bas qatyryp, kóp shyǵyndanbapty. «Aqorda» sóziniń basyna «B» áripin jalǵap «Baqorda» dep atai salypty. Buǵan da shúkir. Aitqan sózimiz júiesin taýypty. Sózimiz qumǵa quiǵan sýdai izim-ǵaiym joǵalmaǵanyna qýandyq.
Aldaǵy ýaqytta jergilikti bilik oryndary «Aqorda» dep bazar, meiramhana, qonaqúi ashqan azamattarǵa kásipkerlik nysandarynyń ataýyn ózgertý týrasynda qatań talap qoiýy kerek. Osylaisha bizder Táýelsizdikti baǵamdap, qadir-qasietin túsinemiz kerek. Eger táýelsizdikke qolymyz jetpegende ózimizdiń «Aqordamyz» bolar ma edi? Árine, bolmaityny anyq.
«Aqorda» degen meiramhanada dúrkiretip toi jasap, ishimdik iship, tóbelesip jatsaq syrttaǵy jurt bizge saýsaǵyn shoshaityp kúlmei me? Sondyqtan bul at ústi qaraityn dúnie emes. Memlekettik mańyzy zor másele. Buǵan tiisinshe mán berip, kezinde ketken qatelikterdi tezdetip túzetýimiz kerek.
Qurmetti oqyrman, ózderińiz turatyn aýyl, aýdandarda «Aqorda» degen ataýdy mańdaishasyna badyraityp jazyp qoiǵan bazar, meiramhana, qonaqúi, qandaida bir kásipkerlik nysan bolsa, bizdiń Feisbýk áleýmettik jelisindegi «Dalanews.kz» paraqshasyna jazyńyz. Bul ispen birlesip kúreseiik.
Nurlan JUMAHAN
https://dalanews.kz/29729
