Senat bet-júzdi jabatyn kiimge tyiym salýdy kózdeitin túzetýdi talqylaýda, dep habarlaidy Dalanews.kz.
Senat «Quqyq buzýshylyqtyń aldyn alý týraly» zańǵa engiziletin, bet-júzdi búrkeitin kiim túrlerine tyiym salýǵa qatysty túzetýdi qarastyryp jatyr. Bul bastama Konstitýtsiialyq zańnama, sot júiesi jáne quqyq qorǵaý organdary máseleleri jónindegi jumys tobynyń otyrysynda talqylanǵan.
Túzetý qabyldansa, el aýmaǵynda adamnyń júzin tolyq jaýyp turatyn maska, balaklava nemese ózge de kiim elementterin kiiýge tyiym salynýy múmkin.
Degenmen, birqatar jaǵdailarda mundai kiimge ruqsat beriledi. Atap aitqanda:
- meditsinalyq sebepter boiynsha;
- qyzmettik mindetterdi oryndaý kezinde;
- sporttyq nemese mádeni is-sharalar barysynda, sondai-aq ózge de erekshe jaǵdailarda.
Eske salaiyq, byltyrmaýsym aiynda Májilis depýtaty Ermurat Bapi qoǵamdyq oryndarda dini kiim kiiý máselesi 2024 jyldyń kúzine qarai qaralatynyn málimdedi.
"Másele hidjabta emes. Másele – islamdaǵy destrýktivti aǵymdardyń Qazaqstandaǵy ulttyq dástúrlerge ziian keltirip jatqanynda. Eger biz zaiyrly memleket retinde damyǵymyz kelse, syrtqy ideologiia men dini yqpaldyń jeteginde bolmaýymyz kerek. Negizgi túitkil – osynda. Bizdiń bolashaǵymyz – óz ulttyq dástúrlerimizde", – dedi Ermurat Bapi Májilis kýlýarynda tilshilerge.
Sonymen qatar, Bapi Parlament dinge jáne basqa aǵymdarǵa qatysty máseleni qolǵa alatyn zań jobasyn engizýdi josparlap otyr degen edi.
“Qujatta mektepke dini kiimmen kelý de bar. Oǵan tolyq tyiym salynady. Qoǵamdyq orynda betti jaýyp turatyn dini kiim kiiýge tyiym salý da bar. Jaza retinde eskertý jasalyp, aiyppul salý da qarastyrylady”, – dedi Bapi.
Al Májilis depýtaty Elnur Beisenbaev elimizde oranýǵa tyiym salatyn zań jobasy joq ekenin atap ótken bolatyn.
Depýtattyń sózinshe, Qazaqstanda dini-nanym senimge tolyǵymen erkindik berilgen.
“Ermurat Seitqazyuly Bapidiń ol jeke pikiri ǵoi. Hidjab, nikabqa qatysty másele bizdi qarastyrylyp jatqan joq. Odan da basqa mańyzdy másele bar ǵoi”, - dedi Elnur Beisenbaev.
