Májilis Eńbek kodeksine engizilgen túzetýlerdi ekinshi oqylymda maquldady. Ózgerister eńbek qaýipsizdigin kúsheitýge jáne qyzmetkerlerdiń quqyqtaryn qorǵaýǵa baǵyttalǵan, dep habarlaidy Dalanews.kz.
Zań jobasy aiasynda Eńbek kodeksine, Áleýmettik kodekske jáne "Halyq densaýlyǵy jáne densaýlyq saqtaý júiesi týraly" kodekske birqatar ózgeris engiziledi. Sonyń eń mańyzdysy – eńbek qatynastarynyń belgileri bar jaǵdaida azamattyq-quqyqtyq sipattaǵy shartty (AQS) qoldanýǵa tyiym salý.
Eńbek qyzmetiniń belgilerine belgili bir mamandyq nemese laýazym boiynsha jumys isteý, qyzmetkerdiń jumysty jeke ózi oryndap, uiymnyń ishki tártibine baǵynýy, sondai-aq eńbekaqynyń jumys nátijesi úshin emes, eńbek protsesi úshin tólenýi jatady. Osy talaptardyń keminde biri anyqtalsa, jumys berýshi mindetti túrde eńbek shartyn jasasýy tiis. Bul bastama ásirese qurylys salasynda jii kezdesetin AQS arqyly eńbek shartyn almastyrý tájiribesin toqtatýǵa baǵyttalǵan.
Sonymen qatar ujymdyq sharttyń mazmuny tolyqtyrylyp, bir mamandyq nemese laýazym boiynsha eń joǵary jáne eń tómengi jalaqy araqatynasynyń shekti deńgeiin belgileý, sondai-aq óndiristik jazataiym oqiǵalar kezinde tólenetin járdemaqy men ótemaqy normalaryn engizý kózdelip otyr. Densaýlyq saqtaý salasyndaǵy ýákiletti organǵa óndiristegi jaraqattyń aýyrlyq dárejesin anyqtaý qaǵidalaryn bekitý quzyreti beriledi.
Budan bólek, kelisim komissiiasynyń jumysyna deldaldy tartý tártibi naqtylanyp, eńbek qaýipsizdigi jáne eńbekti qorǵaý jónindegi mamannyń uiym basshysyna tikelei baǵynýy zańmen bekitiledi. Bul jumys oryndaryndaǵy qaýipsizdikti qamtamasyz etý jaýapkershiligin kúsheitýdi kózdeidi.
