Qazaqstanda "Áskeri baspana" jeńildetilgen ipoteka baǵdarlamasy qaita jandanady. Bul týraly Qorǵanys ministrliginiń baspasóz qyzmeti málimdedi. Ministr Dáýren Qosanov pen "Otbasy bank" basqarma tóraiymy Lázzat Ibragimova kezdesip, áskeri qyzmetshilerdiń baspana máselesin jáne jeńildetilgen nesie sharttaryn talqylady, dep habarlaidy Dalanews.kz.
Ministrdiń aitýynsha, jeke quramnyń áleýmettik ál-aýqatyn arttyrý - Qorǵanys ministrliginiń basty basym baǵyttarynyń biri. Ol Lázzat Ibragimovaǵa "Otbasy bank" mobildi qosymshasyndaǵy máselelerdi jedel sheshkeni úshin alǵys bildirip, onyń tolyq fýnktsionalyn qalpyna keltirýge úmit artty.
Kezdesý barysynda Dáýren Qosanov "Baspana.kz" saitynda engizilgen jańa talaptardyń áskeri qyzmetshilerge jaldamaly turǵyn úi rásimdeýde qosymsha qiyndyqtar týǵyzatynyn atap ótti.
Bólek taqyryp retinde "Áskeri baspana" baǵdarlamasyn qaita iske qosý máselesi qaraldy. Ministr bastapqy jarnany jáne nesie paiyzdyq mólsherlemesin tómendetý múmkindigin qarastyrýdy usyndy.
"Áskeri qyzmetshiler úshin jeńildetilgen ipotekalyq nesiege naqty qoljetimdilik bolýy mańyzdy. Qazirgi jaǵdaida mundai múmkindik shekteýli, al turǵyn úi baǵasynyń qymbattaýy bastapqy jarnany jinaýdy is júzinde múmkin emes etip otyr", — dedi Qorǵanys ministri.
Onyń aitýynsha, qazirgi tańda 15 myńnan astam áskeri otbasy turǵyn úi tólemderi men ipotekalyq baǵdarlamalar, sonyń ishinde "Áskeri baspana" arqyly baspana jaǵdaiyn jaqsartqan.
Dáýren Qosanov burynǵydai áskeri qyzmetshilerge ekinshi naryqtan páter satyp alý múmkindigin qaita engizýdi de usyndy. Onyń pikirinshe, kóptegen áskeriler jóndeýi bar jáne qyzmet ornyna jaqyn, damyǵan infraqurylymy bar páterlerdi jón kóredi.
Kezdesý qorytyndysy boiynsha taraptar áskeri qyzmetshilerdiń turǵyn úige qatysty ózekti máselelerin birlesip sheshýdi jalǵastyrýǵa daiyn ekenderin rastady.
