«AMANAT» partiiasy halyqty sý basý qaýpinen qorǵaý úshin jedel ári keshendi áreket etýdi talap etedi, dep habarlaidy Dalanews.kz.
El aýmaǵynda 400 gidrotehnikalyq nysan bar, olardyń jarylý qaýpi 530-dan astam eldi mekendi sý basýyna ákelýi múmkin. Bul eldi mekenderde 1,3 millionnan astam adam turady. Mysaly, Astana qalasynyń qorǵanys bógetin qaita jańartý jumystary 2020 jyldan beri júrgizilip keledi, alaida áli kúnge deiin aiaqtalmaǵan. Sý tasqynyna daiyndyq jáne gidrotehnikalyq qurylystardyń jaǵdaiy partiialyq baqylaý komitetiniń kezekti otyrysynda talqylandy.
Búginde elimiz boiynsha 1223 eldi meken sý tasqyny qaýpi bar aimaqtarda ornalasqan. Respýblika aýmaǵynda 1395 tirek gidrotehnikalyq nysan bar, onyń 564-i jóndeýdi qajet etedi, al 20-sy apattyq jaǵdaida tur. Eger bul nysandar qirasa, 536 eldi mekendi sý basý qaýpi týyndaidy, onda 1,3 millionnan astam adam turady. Partiianyń qoǵamdyq qabyldaýlaryna biyldyń ózinde sý tasqynyna daiyndyq, bógetterdiń, sý burý arnalardyń jáne basqa da qorǵanys qurylystarynyń jaǵdaiyna qatysty 100-ge jýyq ótinish tústi.
«AMANAT» partiiasynyń Hatshysy Erjan Jylqybaev keibir óńirlerde áli de sheshilmegen máseleler bar jáne bul óz kezeginde aýyr zardaptarǵa ákelýi múmkin ekenin aitty.
«Atbasarda byltyr jaramsyz dep tanylǵan sý ótkizý qurylystarynda áli kúnge deiin jumystar aiaqtalmaǵan. Soltústik Qazaqstan oblysynda birneshe jyldan beri Esil ózeniniń arnasyn tereńdetý jumystary júrgizilgen joq. Mundai mysaldar el boiynsha ondaǵan jerde kezdesedi! Másele – resýrstyń jetispeýshiliginde emes, baqylaý men jaýapkershiliktiń joqtyǵynda. Biz byltyrǵy sý tasqynyndaǵy jaǵdaidyń qaitalanýyna jol bermeýimiz kerek», – dedi ol.
Otyrysta óńir ákimderi qysqa merzim ishinde barlyq josparlanǵan sý tasqynyna qarsy sharalardy júzege asyrý úshin shuǵyl sharalar qabyldaýy tiis ekeni aityldy. Eń aldymen, sý burý arnalarynyń, aryqtar men drenaj júieleriniń daiyndyǵy qamtamasyz etilýi qajet. Sý tasqyny qaýpi bar eldi mekender tolyǵymen qorshalyp, sýdan qorǵaý sharalary kúsheitilýge tiis. Partiialyq baqylaý komitetiniń tóraǵasy Pavel Kazantsev bul máselede partiialyq baqylaý beketteriniń tiimdi jumysy mańyzdy ról atqaratynyn atap ótti.
