Qazir 10 stadion boiynsha jobalaý-smetalyq qujattama daiyndalýda. Bul týraly Qazaqstan Respýblikasy Úkimetiniń otyrysynda Týrizm jáne sport ministri Erbol Myrzabosynov málimdedi dep habarlaidy Dalanews.kz.
Ministrdiń sózinshe, Memleket basshysynyń tapsyrmasyn oryndaý aiasynda oblys ortalyqtarynda fýtbol arenalaryn qaita qurý jáne salý jumystary belsendi túrde júrgizilýde, oǵan demeýshilerdiń qarajattary da tartylýda.
Mysaly, Qyzylorda qalasynda 11 myń kórermenge arnalǵan jańa stadion paidalanýǵa berildi, ol zamanaýi jabynmen jabdyqtalǵan jáne ÝEFA talaptaryna sai keledi.
Astanada 3 600 oryndyq stadionnyń qurylysy jalǵasýda, ony 2026 jyldyń birinshi toqsanynda aiaqtaý josparlanýda.
— Sonymen qatar, 14 jańa stadion salý qajettigi saqtalýda, olardyń 10-y boiynsha jobalaý-smetalyq qujattama ázirlenýde, — dep atap ótti Erbol Myrzabosynov.
Sonymen qatar, 7 jumys istep turǵan fýtbol stadiony qaita jańartýǵa jatady. Qaraǵandy men Óskemende jóndeý jumystary júrgizilýde, Atyraý men Aqtaýda jobalaý-smetalyq qujattama memlekettik saraptamadan oń qorytyndy aldy, al Óskemende jobany memlekettik saraptamadan ótkizý kútilýde.
Sondai-aq, Almaty men Jezqazǵan qalalarynda eki stadion úshin jobalaý-smetalyq qujattama ázirleý qajet.
«Búgingi tańda Qazaqstanda barlyǵy 7 432 fýtbol alańy bar, olardyń 1 420-y jóndeýdi qajet etedi, al qosymsha qajettilik 1 694 alańdy quraidy.
— Osyǵan bailanysty ministrlik balalarǵa arnalǵan fýtbol alańdaryn salý Josparyn bekitti. Jergilikti biýdjetter men jeke investitsiialar esebinen 685 joba iske asyrylýda, — dedi ministr.
