Qazaqstanda 2027 jyldan bastap 11 jastaǵy ul balalardy adam papillomasy virýsyna (APV) qarsy vaktsinatsiialaý pilottyq rejimde qolǵa alynbaq. Bul týraly 2027–2029 jyldarǵa arnalǵan biýdjet jobasyn talqylaý kezinde qarjy vitse-ministri Abzal Beisenbekuly málimdedi, dep habarlaidy dalanews.kz.
Elimizde APV-ǵa qarsy ekpe 2024 jyldyń qyrkúieginen beri 11–13 jastaǵy qyzdarǵa salynyp keledi. Vaktsinatsiia ata-anasynyń nemese zańdy ókiliniń kelisimimen júrgiziledi. Endi profilaktikalyq baǵdarlamaǵa ul balalardy da qosý kózdelip otyr.
Adam papillomasy virýsynyń keibir túrleri qaterli isikke ákelýi múmkin. Bul infektsiia er adamdar arasynda da birqatar onkologiialyq jáne ózge aýrýlardyń paida bolý qaýpin arttyrady. Mamandar ekpeni jasóspirim kezde salý aǵzada virýspen yqtimal bailanysqa deiin qorǵanys qalyptastyrýǵa múmkindik beretinin aitady. Sonymen qatar vaktsinatsiia aýqymynyń keńeiýi infektsiianyń taralýyn tejeýge yqpal etedi.
2027 jylǵa arnalǵan biýdjet jobasynda densaýlyq saqtaý salasyna shamamen 2,5 trln teńge qarastyrylǵan. Qarajat tegin meditsinalyq kómek kórsetýge, dári-dármekpen qamtamasyz etýge, meditsinalyq saqtandyrý men profilaktikalyq baǵdarlamalardy iske asyrýǵa jumsalmaq. Medianalyq jalaqynyń ósýine bailanysty mindetti áleýmettik meditsinalyq saqtandyrý júiesine qosymsha 185 mlrd teńge bólý usynylǵan.
Sondai-aq 2027 jyly Qazaqstannyń tórt óńirinde ókpe obyryn erte anyqtaýǵa arnalǵan pilottyq skrining engizý josparlanyp otyr. Tekserý tómen dozaly kompiýterlik tomografiia arqyly júrgiziledi. Skrining, eń aldymen, 50 jastan asqan azamattarǵa, uzaq ýaqyt temeki shekken nemese buryn shylym shekken adamdarǵa jáne ziiandy óndiriste eńbek etetin qyzmetkerlerge usynylady.
