Qazaqstanda birinshi synypqa qujat qabyldaýdyń jańa tártibi men merzimderi bekitildi, dep habarlaidy dalanews.kz.
Oqý-aǵartý ministrligi Jasandy intellekt jáne tsifrlyq damý ministrligimen birlesip pilottyq jobany iske qosty. Endi ata-analar balasyn ózi mektepaldy daiarlyqtan ótken mekteptiń birinshi synybyna avtomatty túrde tirkei alady.
Iaǵni eger bala sol bilim ordasynda mektepaldy daiarlyqtan ótse, ata-anadan qosymsha ótinish talap etilmeidi. Al basqa mektepti tańdaǵan jaǵdaida qujattar jalpy tártippen qabyldanady.
Ministrlikterdiń málimetinshe, qabyldaý kezeńinde júiege túsetin júktemeni azaitý úshin arnaiy "Kútý bólmesi" júiesi engizilgen. Bul fýnktsiia arqyly ata-analar elektrondy kezektegi óz ornyn baqylap otyra alady.
Jańa tártipke sáikes, 1-synypqa qujat qabyldaý 2026 jylǵy 27 mamyr men 31 tamyz aralyǵynda júrgiziledi. Qabyldaý kezeńderi óńirler boiynsha birneshe kezeńge bólingen.
Atap aitqanda:
– 27 mamyrdan bastap Astana qalasy, Qyzylorda, Batys Qazaqstan, Jetisý jáne Abai oblystarynda;
– 10 maýsymnan bastap Almaty qalasy, Aqmola, Aqtóbe, Jambyl jáne Shyǵys Qazaqstan oblystarynda;
– 18 maýsymnan bastap Shymkent qalasy, Almaty oblysy, Qostanai, Pavlodar jáne Atyraý oblystarynda;
– 29 maýsymnan bastap Túrkistan, Mańǵystaý, Qaraǵandy, Soltústik Qazaqstan jáne Ulytaý oblystarynda qujat qabyldaý bastalady.
Jańa erejeler bastaýysh, negizgi orta jáne jalpy orta bilim berý uiymdaryna qabyldaý tártibine qatysty qoldanylady.
