Qazaqstan qashyqtan jumys istep, saiahattaityn sheteldik týristerge arnalǵan «Neo Nomad» atty jańa viza túrin engizdi, dep habarlaidy Dalanews.kz.
«Qazaqstan Respýblikasynyń prezidenti Q.K. Toqaevtyń tapsyrmasymen Neo Nomad vizasy engizildi. Bul viza zamanaýi kóshpendiler – jumys pen demalysty úilestirip, qashyqtan jumys istep saiahattaityn sheteldik týristerge arnalǵan», — dep habarlady vedomstvo.
Neo Nomad vizasyn alý úshin sheteldik azamattar Qazaqstannan tys jerlerde keminde 3 myń dollar kóleminde tabysy bar ekenin rastap, sottalmaǵanyn dáleldeitin anyqtamasyn usynýy qajet. Bul viza elde bir jylǵa deiin bolýǵa múmkindik berip, sheteldik kompaniialarda jumysyn jalǵastyrýǵa jaǵdai jasaidy.
Baǵdarlama túrli saladaǵy mamandardy – baǵdarlamalaýdan bastap elektrondyq kommertsiiaǵa deiingi mamandardy tartýǵa baǵyttalǵan. Ministrliktiń málimetinshe, baǵdarlamaǵa 500 adam qatyssa, bul el ekonomikasyna jylyna shamamen 3,6 milliard teńge kiris ákeledi.
«Týrizm jáne sport, syrtqy ister, ishki ister ministrlikteriniń jáne basqa da múddeli memlekettik organdardyń birlesken jumysynyń nátijesinde Qazaqstan qazir zamanaýi kóshpendiler úshin saiahat kartasynyń bir bóligine ainaldy. Álem boiynsha olardyń sany 35 millionnan asady jáne biz olardy elimizge tartý úshin barlyq jaǵdaidy jasaýdy kózdep otyrmyz», — dedi Týrizm jáne sport ministri Erbol Myrzabosynov.
