Qazaqstannan pana suraǵan Ýkraina azamattaryna bosqyn mártebesin berý týraly ótinish qanaǵattandyrylmady, dep habarlaidy Dalanews.kz.
Qazaqstan halyqaralyq adam quqyqtary jáne zańdylyq biýrosynyń (QHAQZB) málimetinshe, Donetsk oblysynyń Gorlovka qalasynan kelgen erli-zaiypty Qazaqstannan baspana suraǵan. Olar týǵan elinde áskeri qaqtyǵys júrip jatqanyn, sol sebepti ómirlerine qaýip bar ekenin alǵa tartqan.
Alaida 2025 jyly Aqtóbe oblysynyń jumyspen qamtýdy úilestirý jáne áleýmettik baǵdarlamalar basqarmasy olardyń ótinishin qabyldamai, bosqyn mártebesin berýden bas tartqan. Vedomstvo juptyń zań boiynsha qajetti talaptarǵa sáikes kelmeitinin málimdegen.
Keiin olar sotqa júginip, Ýkrainadaǵy soǵys jaǵdaiy eskerilmegenin aityp shaǵymdanǵan. Biraq Aqtóbe oblysynyń ákimshilik soty talap aryzdy qanaǵattandyrmady. Sot olardyń óz elinde naqty qýdalaýǵa ushyraǵanyn dáleldeitin aiǵaq jetkiliksiz degen sheshim shyǵarǵan.
Apelliatsiialyq sot ta bul sheshimdi ózgerissiz qaldyrdy. Sot alqasy eldegi jalpy turaqsyz jaǵdaidyń ózi bosqyn mártebesin alý úshin jetkiliksiz ekenin, mindetti túrde adamnyń jeke basyna qaýip tóngeni dáleldenýi qajet ekenin atap ótti.
Al quqyq qorǵaýshylar sot sheshimimen kelispei, mundai isterde soǵys júrip jatqan aimaqtan kelýdiń ózi mańyzdy faktor bolýy kerek ekenin aityp otyr. Qazir olar bul is boiynsha kassatsiialyq shaǵym daiyndaýda.
