11 qańtarda Azattyq tilshisiniń suraǵyna jaýap bergen Qazaqstan syrtqy ister ministrliginiń resmi ókili Aibek Smadiiarov osylai dep málimdedi.
"Kiiz úi qoiyldy. Budan qandai problema týyndady? Qoiyldy. Kómek kórsetildi. Bul jeke qazaqstandyq kompaniialardyń bastamasy. Ózderi jinap, ózderi aparyp, ózderi kómektesip jatyr" dedi Aibek Smadiiarov.
Onyń aitýynsha, Qazaqstan jaǵy kiiz úige qatysty arnaiy kommentarii berýdi hosh kórmeidi. Qazaqstanda 300 myńǵa jýyq ýkrain baryn, Ýkrainada da qazaq diasporasy baryn eske salǵan ministrliktiń resmi ókili "árine, Ýkrainada jaǵdai qiyn. Sondyqtan bul aqparat múmkin basqasha kórinip jatqan shyǵar. Biraq biz odan eshqandai másele kórip turǵan joqpyz" dedi.
Qańtar basynda Ýkrainanyń Kiev oblysynda Resei basqynshylyǵynan qatty zardap shekken aýmaqtardyń biri Býchada "Nezlamnosti" iaǵni, "myzǵymastyq" pýnkti ashylǵan edi.
Qazaq úi ishine ornalasqan pýnkt turǵyndarǵa qys kezinde jaryq pen jylý bolmaǵan shaqta turǵyndar kelip, jylynyp, telefondaryn qýattap alý úshin ashylǵan.
Buǵan deiin qazaq úidi qazaqstandyq kásipkerler men Ýkrainadaǵy qazaq diasporasy ókilderiniń tikkeni habarlanǵan.
Bir kún buryn Resei SIM resmi ókili Mariia Zaharova Qazaqstandy Býchadaǵy qazaq úige bailanysty túsinikteme berýge úndegen edi. Zaharovanyń aitýynsha, Qazaqstannyń resmi ókilderi qazaq úige qatysy joǵyn aitqan. Biraq "Resei-Qazaqstan odaqtastyǵyna nuqsan kelmes úshin" resmi Astananyń oǵan túsinikteme bergeni abzal degen edi Zaharova.
11 qańtarda Azattyq tilshisi Qazaqstannyń resmi ókilderinen Zaharovaǵa "kiiz úi" jaily kim "túsinikteme berdi" degen suraqqa Smadiiarov "bilmeimiz" dep jaýap berdi.
