Qazaqstan pasporty halyqaralyq Henley Passport Index 2026 reitinginde aitarlyqtai joǵarylap, álem boiynsha 57-orynǵa kóterildi. Endi qazaqstandyqtar 78 elge vizasyz nemese jeńildetilgen tártippen bara alady, dep habarlaidy Dalanews.kz.
Sońǵy jyldardaǵy kórsetkishter eldiń turaqty ósimin aiqyn kórsetedi:
2023 jyly Qazaqstan 70-orynda bolsa, 2024 jyly – 66-orynǵa, 2025 jyly – 61-orynǵa, al 2026 jyly 57-orynǵa deiin kóterildi. Osylaisha, eki jarym jyl ishinde el birden 13 satyǵa joǵarylaǵan. Bul – óńirdegi eń qarqyndy ósimderdiń biri.
Sarapshylar mundai nátijeni Qazaqstannyń halyqaralyq bailanystardy nyǵaitýy jáne vizasyz rejimdi keńeitý baǵytyndaǵy júieli jumysynyń jemisi dep baǵalap otyr.
Qazaqstan Ortalyq Aziia elderi arasynda kósh bastap tur. Qyrǵyzstan men Ózbekstan 73-oryndy bólisip, 59 elge qol jetkizse, Tájikstan 79-orynda (53 el), al Túrikmenstan 87-orynda (45 el) ornalasqan. Osylaisha, qazaqstandyq pasport ieleri kórshi eldermen salystyrǵanda áldeqaida kóp baǵytqa erkin qatynai alady.
Álemdik reitingtiń kóshin Singapýr bastap tur – onyń azamattary 192 elge vizasyz bara alady. Ekinshi orynda Japoniia men Ońtústik Koreia (188 el), al úshinshi orynda Shvetsiia (186 el). Tórtinshi orynda 185 baǵytqa qoljetimdiligi bar birqatar Eýropa elderi ornalasqan.
Sondai-aq Birikken Arab Ámirlikteri sońǵy 20 jylda erekshe serpilis kórsetip, 5-orynǵa kóterildi. Al AQSh pen Ulybritaniia kerisinshe óz pozitsiialaryn birshama álsiretken.
Mamandardyń aitýynsha, pasporttyń kúsheiýi tek týristik múmkindikterdi ǵana emes, sonymen qatar biznes, investitsiia jáne halyqaralyq áriptestik múmkindikterin de keńeitedi. Vizasyz baǵyttardyń kóbeiýi kásipkerlerge shetelde erkin jumys isteýge, jańa naryqtarǵa shyǵýǵa jáne kelissózder júrgizýge qolaily jaǵdai jasaidy.
Aita keteiik, Henley Passport Index reitingi Halyqaralyq áýe kóligi qaýymdastyǵynyń (IATA) derekterine negizdelip jasalady jáne álemdegi eń bedeldi kórsetkishterdiń biri sanalady.
