Tashkent qalasynda "Maily daqyldardy qaita óńdeýshilerdiń ulttyq qaýymdastyǵy" zańdy tulǵalar birlestigi men ózbekstandyq "Fayz Oil Imports" JShQ kompaniiasy ózara yntymaqtastyq týraly memorandýmǵa qol qoidy, dep habarlaidy Dalanews.kz.
Kelisim aiasynda "Fayz Oil Imports" kompaniiasy jyl boiy 60 million AQSh dollaryna Qaýymdastyq quramyna kiretin qazaqstandyq óńdeý kásiporyndarynyń mai-toń mai ónimderin satyp alýdy josparlap otyr.
Ózbekstan – qazaqstandyq mai-toń mai ónimderiniń iri bes importtaýshysynyń biri. 2024-2025 jylǵy merzimde Qazaqstannan Ózbekstanǵa ósimdik mailary men joǵary aqýyzdy mal azyǵy (shrot pen kúnjara) 349 million AQSh dollaryna eksporttaldy. Bul aldyńǵy maýsymmen salystyrǵanda 82%-ǵa kóp.
Qazaqstan ótken jyly Ortalyq Aziia elderine ósimdik mailary men maily daqyldardy qaita óńdeý ónimderin eksporttaý boiynsha kóshbasshy ornyn nyǵaityp, Ózbekstan men Tájikstannyń negizgi jetkizýshisine ainaldy.
Ózbekstan naryǵyndaǵy qazaqstandyq maidyń úlesi 65%-ǵa (2017 jyly – 13%) jetti, al Tájikstanda 74 paiyz (2017 jyly – 15%). Sonymen qatar, Qazaqstan óńir elderin tolyqtai qus jáne mal azyǵyn óndirýde mańyzdy quramdas bólik sanalatyn kúnbaǵys shroty men kúnjarasymen qamtamasyz etip otyr.
"Bizdiń mai-toń mai ónimderimiz álemdik naryqta joǵary suranysqa jáne aitarlyqtai eksporttyq áleýetke ie. Biz ónimdi 20-dan astam elge jetkizemiz. Qazaqstannan eksporttalatyn kúnbaǵys maiynyń kólemi qazirdiń ózinde Ortalyq Aziia elderiniń jiyntyq importynan 1,5 esege kóp, qajet bolǵan jaǵdaida biz bul naryqty tolyq qamtamasyz ete alamyz", - dep atap ótti Maily daqyldardy qaita óńdeýshilerdiń ulttyq qaýymdastyǵy.
