Qazaqstan, Ázerbaijan jáne Ózbekstan prezidentteri úsh eldiń energetikalyq júiesin integratsiialaý jónindegi strategiialyq kelisimge qol qoidy,- dep habarlaidy Dalanews.kz.
SOP29 Dúniejúzilik klimat sammitiniń aiasynda memleketter basshylary Qasym-Jomart Toqaev, Ilham Áliev pen Shavkat Mirziioev Qazaqstan Respýblikasy, Ázerbaijan Respýblikasy jáne Ózbekstan Respýblikasy arasyndaǵy jasyl energiiany óndirý jáne berý salasyndaǵy strategiialyq seriktestik týraly kelisimge qol qoidy.
Memleket basshysy búgingi aitýly oqiǵa ornyqty damýǵa ortaq umtylys tarihynyń jańa paraǵyn ashqanyn atap ótti.
– Strategiialyq seriktestik týraly kelisimge qol qoiý – Ortalyq Aziia men Ońtústik Kavkaz óńirleriniń úshjaqty yntymaqtastyǵyn damytýdaǵy mańyzdy kezeń. Qujat elderimizdiń energetikalyq júielerin integratsiialaý, sondai-aq Eýropa elderi men basqa da naryqtarǵa ekologiialyq taza energiiany jetkizetin senimdi dálizderdi qalyptastyrý úshin jańa múmkindikterge jol ashady. Munda Qazaqstan iri tranzit aýmaǵy retinde úlken ról atqarady. Atalǵan kelisimniń naqty nátijeleri úsh eldiń ekonomikalaryn biriktirip, Orta dálizdi «jasyl kópir» retinde damytýǵa yqpal etedi. Bul mańyzdy saladaǵy tyǵyz yntymaqtastyq memleketter arasyndaǵy tájiribe men ozyq tehnologiialardy almasýǵa serpin beredi, sondai-aq energetikalyq qaýipsizdigimizdi nyǵaitýǵa septigin tigizedi, – dedi Prezident.Qasym-Jomart Toqaevtyń aitýynsha, kómirtegi beitaraptyǵyna jetýdi kózdeitin Qazaqstan úshin jasyl energetika mańyzdy baǵyt sanalady.
– Biz qazba bailyqtarǵa táýeldilikti azaitýǵa belsendi túrde kiristik. Tehnologiialyq innovatsiialardy damytyp, ekologiialyq ornyqty órkendeýge demeý bolatyn infraqurylym qurýǵa bet burdyq. Qazaqstan sheteldik seriktestermen jalpy qýaty 43 GVt bolatyn «jasyl» jobalardy júzege asyrý jóninde ýaǵdalastyqqa qol jetkizdi, – dedi Memleket basshysy.Ázerbaijan Prezidenti Ilham Áliev búgingi kelisimder úsh memleket arasyndaǵy baýyrlastyq qatynastar men strategiialyq seriktestikti jańa deńgeige shyǵaratynyn atap ótti
– Ortalyq Aziia men Kavkaz óńiri kóptegen másele boiynsha, sonyń ishinde «jasyl» energiiany damytý salasynda birlesip áreket etedi. Biz qaita jańǵyrtylatyn energiia kózderi baǵytynda Qazaqstan men Ózbekstannyń aýqymdy josparlary men qol jetkizgen jetistikteri jaiynda jaqsy bilemiz, – dedi Ázerbaijan Prezidenti.
– Atalǵan jobanyń ekologiialyq mańyzyn erekshe atap ótkim keledi. Jelden, kúnnen alynatyn qýat klimattyń jumsarýyna áser etedi. Osy arqyly biz Parij kelisimi aiasynda klimatty qorǵaý jóninde birlesken kúsh-jigerge qoldaý bildirip, ornyqty damý maqsattaryna qol jetkizýge atsalysamyz, – dedi Shavkat Mirziioev.
