2025 jyldyń qorytyndysyn shyǵarǵan avtoónerkásip ókilderi salanyń basty basymdyǵy retinde avtoparkti jańartýdy ǵana emes, ony adami kapitaldy damytýmen ushtastyrýdy atady, dep habarlaidy Dalanews.kz.
Salalyq talqylaýdyń negizgi ózegi – tehnologiialyq ósimniń irgetasy retinde kadr daiarlaý máselesi.
«Perspektivy razvitiia avtoindýstrii Kazahstana 2026: trendy i prognozy» atty baspasóz konferentsiiasyn Qazaqstannyń Avtokólik Odaǵy uiymdastyrdy. Is-sharaǵa Allur, Orbis Auto, Astana Motors jáne SemAZ ókilderi qatysty.
QAO men Biýro natsionalnoi statistiki derekterine sáikes, 2025 jyly jańa avtokólikter naryǵy 14,4%-ǵa ósip, qatarynan ekinshi jyl 200 myń satylym mejesinen asty. Onyń 69%-y – otandyq óndiris úlesinde. Degenmen avtopark qurylymy áli de «qartaiǵan»: kólikterdiń 41%-dan astamy 20 jyldan eski. Myń adamǵa shaqqanda 291 avtokólik keledi, al damyǵan elderde bul kórsetkish 500-ge jýyq.
Naryq oiynshylary avtoparkti jańartýdy tek qarjylyq tetiktermen shekteýge bolmaitynyn atap ótti. Zamanaýi óndiris komponentterdi jergiliktendirýdi, robottandyrýdy jáne halyqaralyq sapa standarttaryn saqtaýdy talap etedi. Bul – joǵary bilikti injenerler men tehnikalyq mamandarsyz múmkin emes.
QAO prezidenti Anar Makasheva avtoparkti jańartý qaýipsizdik, ekologiia jáne tehnologiialyq damý máselesi ekenin aitty. Demek, búkil óndiristik tsikldi qamtamasyz etetin kadrlardyń biliktiligi sheshýshi ról atqarady.
2025 jyldyń Jumysshy mamandyqtar jyly bolyp jariialanýy injenerlik jáne óndiristik baǵyttarǵa basymdyqty kúsheitti. Bul avtoónerkásip úshin básekege qabilettilik pen tehnologiialyq egemendiktiń strategiialyq faktory sanalady.
Oksana Holstinina, Allur prezidenti, CKD-óndiris, robottandyrý jáne halyqaralyq brend standarttary joǵary bilikti kadrlardy qajet etetinin atap ótti. Onyń aitýynsha, 2025 jyly tórt myńnan astam qyzmetker men stýdent kompaniianyń korporativtik ýniversitetinde bilim alǵan. Dýaldy baǵdarlamalar keńeitilip, JOO men kolledjdermen yntymaqtastyq tereńdetilýde.
Sonymen qatar dilerlik jeli, servistik infraqurylym jáne kepildik qyzmet kórsetý baǵyttary da kásibi quzyrettilikti arttyrýdy talap etedi. Naryqtaǵy mámilelerdiń 70%-dan astamy nesielik baǵdarlamalar arqyly júzege asady, bul protsesterdiń ashyqtyǵy men qyzmetkerlerdiń kásibiligine qoiylatyn talapty kúsheitedi.
Ulttyq statistika biýrosynyń málimetinshe, 2025 jylǵy jeltoqsanda jańa jeńil avtokólikterdiń tutyný baǵalary indeksi ótken jyldyń sáikes kezeńimen salystyrǵanda 105,4%-dy quraǵan. Al otandyq óndiristegi kólikter baǵasynyń ósimi nebári 1,9% bolǵan. Sarapshylar muny jergiliktendirý men óndiristi jańǵyrtýdyń nátijesimen bailanystyrady.
Sala kóshbasshylarynyń pikirinshe, 2026 jyl sapalyq nyǵaiý kezeńi bolmaq. Modeldik qatardy keńeitý men komponenttik bazany damytý adami kapitaldy júieli túrde kúsheitýmen qatar júredi. Osylaisha, Qazaqstan avtoónerkásipti tek óndiris arqyly emes, bilim men kadrlyq áleýet arqyly da qalyptastyryp otyr.
