«Qazaqmys korporatsiiasy» JShS basshylyǵy kásiporynnyń eńbek ujymdarymen turaqty kezdesý ótkizý tájiribesin jalǵastyrýda. Kezekti jumys jiyny Jezqazǵanda Basqarma basshysy Rýslan Óskenáli men Baqylaý keńesiniń tóraǵasy Nurmuhambet Ábdibekovtyń tóraǵalyǵymen ótti. Kezdesýde 2026 jylǵy qańtar-sáýir ailarynyń jumys qorytyndysy shyǵarylyp, kompaniianyń negizgi basymdyǵy aiqyndaldy, dep habarlaidy dalanews.kz.
Óndiristik qaýipsizdik salasyndaǵy basty nátije — 2026 jyldyń alǵashqy tórt aiynda kompaniianyń óz qyzmetkerleri arasynda ólimmen aiaqtalǵan oqiǵanyń múlde tirkelmeýi boldy. Shtattaǵy qyzmetkerler arasyndaǵy jaraqattaný deńgeii 35%-ǵa qysqaryp, LTIFR kórsetkishi birtindep tómendep keledi.
Kompaniiada qaýipsizdik talabynyń saqtalýy qatań baqylaýǵa alyndy. Jyl basynan beri jumys oryndarynda júzdegen óndiristik aralaý júrgizilip, kásiporyndardyń alǵashqy basshysynyń qatysýymen toqtatý jinalystary uiymdastyryldy. Sonymen qatar jańadan ornalasqan jumyskerler úshin Q-start kirispe oqytý baǵdarlamasy iske qosyldy.
Sonymen qatar Qazaqmys shikizat qoryn damytýǵa baǵyttalǵan geologiialyq barlaý jumysy men investitsiia kólemin aitarlyqtai arttyryp keledi. Buǵan deiin paidalaný maqsatyndaǵy burǵylaý kólemi jylyna shamamen 63 000 qýma metrdi qurasa, 2026 jyly tek Jezqazǵan baǵyty boiynsha geologiialyq barlaý maqsatyndaǵy burǵylaý jospary 62 400 qýma metrge jetti. Bul – úsh óńirlik baǵyttyń tek biri ǵana. Jalpy alǵanda, geologiialyq barlaý baǵdarlamasy eki eselenip otyr. Tórt ai ishinde bes negizgi kásiporynda úzdiksiz jumys isteitin 7 burǵylaý qondyrǵysynyń kúshimen 20 000 qýma metrden astam aýmaq burǵylandy.
Geologiialyq barlaýdy damytý maqsatynda jańa jerasty burǵylaý qondyrǵylary satyp alyndy, burǵylaý brigadasynyń infraqurylymy jańartyldy jáne qysqy mezgilde toqtaýsyz jumys isteý úshin tiisti jaǵdai jasaldy. Sonymen qatar kompaniia buryn igerilmegen ken qoryn zertteýdi jalǵastyrýda.
2026 jyl óndiriske aýqymdy investitsiia baǵyttalǵan naqty betburys kezeńine ainaldy — bir mezette birneshe baǵyt boiynsha iri jobalar iske asyryldy.
Óndiristik aktivti jańartý baǵdarlamasy aiasynda Balqash mys balqytý zaýytynda kúkirt qyshqyly tsehynyń negizgi jabdyǵy aýystyryldy, PV-1 peshine josparly kúrdeli jóndeý merzimi qysqartyldy. Jezqazǵan, Balqash qalalarynda metallýrgiialyq qýatty jańǵyrtý boiynsha iri jobalardy júzege asyrý jalǵasýda.
Budan bólek, Jomart, Jylandy jáne Nurqazǵan kenishterinde jabdyqty jańartý baǵdarlamasy júzege asyrylýda. Bul jobalardyń negizgi maqsaty — óndiristik qýatty arttyrý jáne ónerkásiptik qaýipsizdik deńgeiin kúsheitý.
Qańtar-sáýir ailarynyń qorytyndysy boiynsha kompaniia kontsentrattaǵy jáne katodty mys óndirisi boiynsha josparly kórsetkishti asyra oryndady. Jekelegen óndiristik bólimshelerde eńbek ónimdiliginiń deńgeii sońǵy jyldardaǵy eń joǵary kórsetkishke jetti.
Sonymen qatar kompaniia jumyskerlerdiń áleýmettik-turmystyq jaǵdaiyn jaqsartýǵa baǵyttalǵan aýqymdy baǵdarlamany jalǵastyrýda. Kásiporyndarǵa jumyskerlerdi tasymaldaýǵa arnalǵan 90 jańa avtobýs jetkizilip, sanitarlyq-turmystyq nysandar jańǵyrtylýda. Kiim aýystyratyn bólmeler men demalys bólmeleri jańartylyp, densaýlyq saqtaý pýnktteri men meditsinalyq bólimsheler zamanaýi quraldarmen jabdyqtalýda.
Jumyskerlerdi áleýmettik qoldaý baǵdarlamasy turaqty túrde júzege asyrylýda. Jumyskerlerge qyzmettik páter berilip, balalardyń jazǵy demalysy uiymdastyrylýda, qyzmetkerlerdi shipajaida emdeý múmkindigi qarastyrylǵan, sonymen birge korporativtik meditsinalyq infraqurylym kezeń-kezeńimen damyp jatyr.
Kezdesýdi qorytyndylai kele, Rýslan Óskenáli kompaniia qaýipsizdikti arttyrý, óndiristi jańǵyrtý jáne eńbek jaǵdaiyn jaqsartý baǵytyndaǵy júieli jumysty jalǵastyryp jatqanyn atap ótti. Sonymen qatar kásiporyndardyń turaqty jumysyn qamtamasyz etý jáne eńbek ujymy aldyndaǵy barlyq mindettemelerdi oryndaý erekshe nazarda ekenin jetkizdi.
