«Qazaqmys» korporatsiiasynyń burynǵy qyzmetkeri, himiialyq zerthanalar basqarmasynyń eks-basshysy BAQ-ta málimdeme jasaǵan soń, kompaniia ókili ony jaýapqa tartýdy talap etken, dep habarlaidy Dalanews.kz.
«Temirtaý politsiiasynan habarlasyp, «Qazaqmystyń» aryzy bar ekenin, onyń Astanaǵa joldanatynyn aitty. Májilis depýtaty Perýashevtiń málimdemesinen keiin «Qazaqmys» maǵan qarsy aryz berýge májbúr boldy», – dedi KazTAG tilshisine Baqyt Ádilova.
«Qazaqmys» burynǵy qyzmetkerin korporatsiia týraly aqparat taratqany úshin ákimshilik jaýapkershilikke tartýdy suraýda. Kompaniia ókili bul aqparatty «jalǵan» dep ataǵan.
KazTAG tilshisi Qaraǵandy oblysynyń politsiia departamentinen Baqyt Ádilovaǵa qatysty aryzdyń qabyldanǵan-qabyldanbaǵanyn surady. Alaida departament bul suraqqa jaýap bergen joq.
Sondai-aq KazTAG «Qazaqmystyń» baspasóz qyzmetinen burynǵy qyzmetkerine qatysty naqty qandai shaǵymdar bar ekenin surady. Kompaniia ókilderi bul másele boiynsha korporatsiia keńsesine resmi suranys joldaýdy usyndy. Tiisti suranys jiberildi.
Buǵan deiin Májilis depýtaty Azat Perýashev «Qazaqmystyń» qyzmetine qatysty depýtattyq saýal joldap, iri jer qoinaýyn paidalanýshylardyń «sirek jer metaldaryna kúmándi kózqarasyna» nazar aýdarǵan bolatyn. Ol burynǵy «Qazaqmys» qyzmetkeriniń sózine súiene otyryp, ken men mys kontsentratyn shetelge tasymaldaý máselesin kóterdi. Alaida Baqyt Ádilova «Qazaqmys» sirek jer metaldaryn shetelge shyǵarady dep eshqashan aitpaǵanyn málimdedi.
Depýtattyq saýalda Perýashev, sonymen qatar, Qazaqstannan shyǵarylatyn ken men kontsentrattarǵa saraptama júrgizý talaptarynyń bar-joǵyn naqtylaýdy surady. Eger mundai talaptar bolmasa, onda jalǵan aqparat taratyp, kompaniialar men salanyń bedeline nuqsan keltirgenderge qarsy sotqa shaǵym túsirý qajet ekenin aitty.
Kóp uzamai «Qazaqmystyń» burynǵy qyzmetkeri Baqyt Ádilovaǵa qatysty politsiiaǵa aryz túskeni belgili boldy. Depýtat saýalynda silteme jasaǵan tulǵa endi quqyq qorǵaý organdarynyń nazaryna ilikti.
