«QazaqGaz» UK» AQ enshiles uiymy – «QazaqGaz Aimaq» AQ 2026–2027 jyldardaǵy kúzgi-qysqy kezeńge gaz taratý júielerin daiyndaý jumystaryn jalǵastyryp jatyr. Qazirgi tańda josparlanǵan is-sharalardyń oryndalý deńgeii 34%-ǵa jetti, dep habarlaidy dalanews.kz.
«Daiyndyq jumystary gaz taratý jelileriniń 77 myń shaqyrymnan astamyn jáne gaz sharýashylyǵynyń 287 myńnan astam nysanyn qamtidy. Aldaǵy jylytý maýsymynda tutynýshylardy senimdi ári qaýipsiz gazben qamtamasyz etý maqsatynda jumystarǵa óndiristegi 5 myńnan astam qyzmetker jumyldyrylǵan», - dedi «QazaqGaz Aimaq» AQ óndiristik-tehnikalyq departamentiniń direktory Asqar Qonaqbaev.
Daiyndyq aiasynda gaz retteý pýnktterine aǵymdaǵy jóndeý jumystary júrgizilip, ajyratqysh qurylǵylarǵa tehnikalyq qyzmet kórsetilýde. Sonymen qatar elektrohimiialyq qorǵanys quraldary jóndelip, gaz qubyrlaryna aspaptyq tekserýler júrgizilýde.
Kompaniia gaz taratý infraqurylymynyń senimdiligin arttyrýǵa erekshe nazar aýdaryp otyr. Biyl gaz qysymynyń tómendeý sebepterin joiýǵa, sondai-aq taratý jelilerindegi apattar men túrli oqys oqiǵalardyń aldyn alýǵa baǵyttalǵan 227 is-shara iske asyrylýda.
Olardyń qatarynda gaz qubyrlaryn saqinalaý, qosymsha shkaftyq gaz retteý pýnktterin ornatý, qysym rettegishterin jańartý jáne gaz qubyrlarynyń jekelegen ýchaskeleriniń ótkizý qabiletin arttyrý maqsatynda diametrin ulǵaitý jumystary bar.
Tutynýshylardyń qaýipsizdigin qamtamasyz etý kompaniia qyzmetiniń basym baǵyttarynyń biri bolyp qala beredi. Osyǵan bailanysty turmysta gazdy qaýipsiz paidalaný mádenietin qalyptastyrýǵa baǵyttalǵan aýqymdy aqparattyq-túsindirý jumystary júrgizilýde.
Ótken jylytý maýsymynda respýblikalyq jáne óńirlik telearnalarda 580-nen astam beinerolik kórsetildi. Sonymen qatar jergilikti atqarýshy organdarmen jáne tótenshe jaǵdailar qyzmetterimen birlesip 470-ten astam profilaktikalyq reid uiymdastyrylyp, buqaralyq aqparat quraldarynda 300-ge jýyq material jariialandy. Halyq arasynda 130 myńnan astam jadynama taratyldy.
Sondai-aq Qazaqstan Respýblikasy Tótenshe jaǵdailar ministrligimen birlesip, gazdy qaýipsiz paidalaný mádenietin arttyrý maqsatynda 112 qyzmeti arqyly apta saiyn SMS-habarlamalar jiberý uiymdastyryldy.
«Qaýipsizdik deńgeiin arttyrý jáne gazdyń shyǵý oryndaryn der kezinde anyqtaý maqsatynda «QazaqGaz Aimaq» AQ zamanaýi mobildi diagnostikalyq keshenderdi belsendi qoldanýda. Jyl basynan beri «DLS Pergam» mobildi zerthanasynyń kómegimen 5 595 shaqyrym gaz taratý jelisi tekserildi. Tekserý nátijesinde 104 gaz shyǵý deregi anyqtalyp, tolyqtai joiyldy», - dep atap ótti Asqar Qonaqbaev.
Sonymen qatar eldi mekenderdi gazdandyrý jobalary kezeń-kezeńimen júzege asyrylýda. Astana qalasynda gazdandyrýdyń birinshi jáne ekinshi kezeńderi tolyq aiaqtalyp, úshinshi kezeń boiynsha jumystar jalǵasyp jatyr. Barlyq kezeń aiaqtalǵannan keiin elordadaǵy shamamen 300 myń turǵyn tabiǵi gazǵa qol jetkizedi. Búginde gaz qalanyń negizgi energetikalyq infraqurylym nysandaryna, sonyń ishinde JEO-1, JEO-2, JEO-3 jáne gaz jylý stantsiialaryna jetkizilgen.
Qosshy qalasynda da gazdandyrý jobasy kezeń-kezeńimen iske asyrylýda. Birinshi iske qosý kesheni paidalanýǵa berilgennen keiin 8 myńǵa jýyq abonent tabiǵi gazǵa qosylý múmkindigine ie boldy. Al 2026 jyly kelesi keshenderdi iske qosý nátijesinde qosymsha 10 myńnan astam tutynýshy kógildir otynmen qamtylady.
Aqmola oblysynda da aýqymdy jumystar atqarylyp jatyr. Sońǵy jyldary Arshaly jáne Tselinograd aýdandaryndaǵy ondaǵan aýyl men eldi meken tabiǵi gazǵa qosyldy. 2026–2027 jyldary óńirdegi gaz infraqurylymyn odan ári keńeitý josparlanyp otyr. Bul jańa eldi mekenderdi ekologiialyq taza ári qolaily energiia kózimen qamtamasyz etýge múmkindik beredi.
«QazaqGaz Aimaq» AQ jylytý maýsymy kezeńinde elimizdiń barlyq óńirindegi tutynýshylardy senimdi, qaýipsiz jáne úzdiksiz gazben qamtamasyz etý baǵytyndaǵy júieli jumystardy jalǵastyrýda.
