Qazaq tilin damytýǵa úles qosyp júrgen amerikalyq arý Rakel Reinagel Ǵylym jáne joǵary bilim ministrligi usynǵan arnaiy marapatqa ie boldy, dep habarlaidy Dalanews.kz.
Ǵylym jáne joǵary bilim ministri Saiasat Nurbek til janashyryna “Ana tilin damytýǵa qosqan úlesi úshin” tósbelgisin tabystady.
“Qýanyshymda shek joq, tańdanysymdy jasyra almadym. Áleýmettik jelidegi ómirimdi kórsetý arqyly qoǵamǵa áser etip, osyndai qurmetke ie bolamyn dep oilamadym. Qazaq tiline qosqan úlesim kóldegi bir tamshy sý sekildi dep aitar edim. Marapat úshin qazaqsha sóilemeimin. Qazaq tilinde sóileý – ónegeli ómir súrýim úshin jasaǵan sanaly tańdaýym. Tósbelgi úshin kóp raqmet! Shyn júrekten rizamyn, óte qýanyshtymyn”, — dedi bloger.
Aita keteiik, amerikalyq arý álemjelide óte belsendi. Ol únemi qazaq tilinde sóilep, ana tilimizdiń mártebesin kóterip keledi.
Buǵan deiin qazaqsha sóileitin AQSh azamaty oryssha qyzmet kórsetken meiramhanalardy synǵa alǵan edi.
Ol Almatydaǵy birneshe meiramhanaǵa bas suqqan. Alaida basym bóligi tek orys tilinde qyzmet kórsetken.
“Osy aptada Almatyda boldym. Kóp meiramhana men kafelerge bardym. Barlyq jerde tek qazaq tilinde sóiledim. Jalpy qazaq tilinde sóileimin. Biraq 18 meiramhananyń tek beseýi menimen qazaq tilinde sóilesti”, - dep tańǵaldy amerikalyq arý.
Sheteldik azamat solai dei kele ózine qazaq jáne orys tilinde qyzmet kórsetken meiramhanalar men kafelerdiń tizimin kórsetken bolatyn.
“Meiramhanalardyń kóbi qazaq tilinde sóilegenime qaramastan, oryssha jaýap qatty. Arasynda sózimdi durys túsinbegenderi de boldy. Men úsh jyl boiy qazaq tilin úirendim. Qazaqstanda bolmasam da, qazaq tilin úirený úshin qajyrly eńbek ettim. Biraq Almatyda eshkim menimen qazaq tilinde sóilespeidi. Astanada da dál solai”, - dep kúiingen edi ol.
