Májilis depýtaty Erlan Sairov Prezident Qasym-Jomart Toqaevtyń Joldaýyna orai depýtattyq saýal joldady, dep habarlaidy Dalanews.kz.
Depýtattyń aitýynsha, Memleket basshysy ár Joldaýynda «Ádiletti Qazaqstan» qurýdaǵy ustanymdarynyń myzǵymastyǵyn kórsetip keledi. «Yqpaldy Parlament», «Zań jáne tártip», «Estitin memleket», «Taza Qazaqstan», «Adal azamat» siiaqty saiasi tujyrymdar qoǵam sanasynyń ajyramas bóligine ainaldy.
"Jyldar boiy qordalanǵan máselelerdi sheshýdiń negizinde naqty jobalyq tásil jatyr. «AMANAT» partiiasy da osy joldy ustanyp keledi. Máselen, úsh jyl ishinde «Jer amanaty» jobasy aiasynda paidalanylmaǵan jáne zańsyz alynǵan aýyl sharýashylyǵy jerlerin memleketke qaitarý boiynsha aýqymdy jumys atqaryldy", – dedi Sairov.
Onyń sózinshe, 2022 jyldan beri memleketke 13,5 mln gektar jer qaitarylǵan. Biraq sonyń tek 6 mln gektary ǵana jańa jer paidalanýshylarǵa berilgen.
Depýtat bul jaǵdai 7,5 mln gektar jerdiń bos turýyna, al 82,9 mln gektar jer qorynyń tiimsiz paidalanylýyna ákelgenin atap ótti. Buǵan qosa, 29 mln gektar jer degradatsiiaǵa ushyraǵan, onyń ishinde 3 mln gektarǵa jýyq aýmaq tuzdanýǵa beiim.
"Jerdi tiimdi bólý úshin topyraqtyń sapalyq jaǵdaiy, áleýetti ónimdiligi jáne aýyl sharýashylyǵy óndirisiniń túrli túrlerine jaramdylyǵy týraly naqty aqparat qajet. Alaida Qazaqstanda jerdiń degradatsiiasy men jaramdylyǵy týraly derekterdi jinaqtaityn biryńǵai aqparattyq júie joq", – dedi ol.
Sairovtyń aitýynsha, bul másele azyq-túlik qaýipsizdigine, investitsiialyq tartymdylyqqa jáne aýyldaǵy jumyspen qamtylýǵa tikelei áser etedi. Sondyqtan Prezident óz Joldaýynda jer tek onyń qundylyǵyn túsinetin azamattarǵa beriletinin atap, jer resýrstarynyń Tsifrlyq kartasyn jasaýdy tapsyrdy.
«AMANAT» fraktsiiasynyń depýtattary tómendegi sharalardy shuǵyl júzege asyrýdy usynady:
-
Kelesi egis naýqanyna deiin qalǵan 7,5 mln gektar jerdi aýyl turǵyndaryna ádil, ashyq jáne zańdy túrde bólý;
-
Jer resýrstarynyń Tsifrlyq kartasy men jaiylym kadastryn jedel iske qosý, bul fermerler men aýyl turǵyndaryn jaiylymmen qamtamasyz etýge múmkindik beredi;
-
Jerdiń naqty derekterin kadastrlyq málimettermen biriktirý.
