Ońtústik Qazaqstan oblysy, Saryaǵash aýdanyndaǵy Qoshqar ata aýylynda Kelimbet kóshesi bar. Ol kósheniń basynda Kelimbetovter áýletiniń qara shańyraǵy ornalasqan.
– Qairat bizdiń qolda ósken bala ǵoi. Aǵasy Muhit ekeýi jyl saiyn jazda bizdiń úige keletin. Kún uzaq dalada oinap, dop teýip, keshqurym ózim shomyldyratynmyn. Qairat qoldyń nanyn súisinip jeitin, – dep áńgimesin bastady Yryqsy apa.
Sonymen qatar Qairat Nematuly ázilge óte jaqyn bolyp ósken bala bolǵan eken.
– Kishkentai ǵana tompaq qara bala Qairat óte kóńildi júretin. Anekdot aitqanda aýzyń ańqiyp qalady. Ásirese qytai men japondyqtar týraly anekdottary kez kelgen adamdy kúldirip jiberetin. Qyrsyqqanda esime eshbiri túspei otyr... Ortasyna qýanysh syilap júretin onyń teris qylyqtary múldem bolmaǵan. Spirttik ishimdik iship, temeki tartqanyn esh kórmeppin, – dedi Qairattyń jeńgesi Yryqsy apa.
Bala kúninde jyl saiyn jazǵy kanikýlda aýylǵa qarai bet buratyn bala Qairat es bilgeli kelýdi siretken. Sońǵy ret osydan eki jyl buryn kelip ketipti. Ol kezde ákesi Nemattyń arýaǵyna as bergen. Týystary ol biyl tamyz aiynda kelip qalar dep úmittenip otyr. Sebebi tamyzda ákesi Nemat dúnieden ozǵan.
[caption id="attachment_17351" align="aligncenter" width="819"]
Yryqsy apa Kelimbetovtiń aýylǵa jii kelmeýin jumysymen bailanystyrady. Tipti óz sózinde Ulttyq banktegi basshylyq qyzmetinen góri qazirgi jumysy jaqsy boldy deidi. Sebebin bilgimiz kelgende «qulaǵy tynysh qoi» dep ármen qarai ashyp aitqysy kelmedi.
Qairat Kelimbetov ákesiniń aýylyna jii kelmese de, ózine qonaqqa barǵan týystaryn jaqsy kútip, tipti kelip-ketý jolkirelerine deiin ózi kóteredi. Ákesiniń baýyrlaryn barǵan saiyn kiindirip jiberedi.
«Al materialdyq turǵyda týystaryna qarasyp tura ma?» degen saýalymyzǵa aǵasy men jeńgesi únsiz qalyp, aldyna eshqashan kómek surap barmaǵanyn aitty.
– Qudaiǵa shúkir, bizdiki ózimizge jetedi. Kúieýim ekeýmiz de zeinetkermiz. Qarnymyz toq. Osy ýaqytqa deiin Qairattyń aldyna kómek surap barmadyq. Bara qalsaq, betimizdi qaitarmaidy degen senimdemin. Sebebi ol qansha jerden orys minezdi bolsa da, tárbie kórgen bala. Ákesi men anasy altyn adamdar boldy. Ainalasyndaǵylarǵa únemi jaqsylyq jasap júretin, – dep ótkenge kóz júgirtken Yryqsy apa úiindegi qonaq bólmege arnalǵan stenka men kilemdi, kire-beristegi sákini (topchan) Nemat Kelimbetuly alyp bergenin aityp berdi.
[caption id="attachment_17352" align="alignleft" width="453"]
Búginde «Astana» halyqaralyq qarjy ortalyǵynyń basshysy Qairat Kelimbetovtiń týystarynyń aitýynsha, eks-bankirdiń bir qyz, eki uly bar. Jary Fatima Almatynyń qyzy. Al qaiyn atasy Pavlodardyń týmasy. Óziniń ákesi Nemat Kelimbetuly elge belgili jazýshy bolǵan.
Ǵumyrynyń sońǵy on úsh jylynda sal aýrýyna shaldyqqanyna qaramastan shyǵarmashylyǵyn toqtatpaǵan onyń «Úmit úzgim kelmeidi» týyndysy talai oqyrmannyń júregine jylýlyq syilady.
Fatima men Qairattyń qyzdary Shynar Almatyǵa turmysqa shyqqan. Búginde Shveitsariiada turady. Al bir uly Amerikada tursa, ekinshi ulynyń qaida ekenin týystary bilmeitin bolyp shyqty.
Aitpaqshy, Kelimbet kóshesine bul esimniń berilgenine on jyldai ýaqyt bolypty. Buryn Kommýna bólimshesi atalǵan. Otyz shaqty úi ornalasqan bul kóshede jaryq ta, sý da, tipti kógildir otyn da bar. Qyryq jyldan beri atalǵan kóshede turyp jatqan Baian Musabekova endi asfalt máselesi sheshilse degen niette. Onyń kórshileri de bul tilekpen kelisedi.
Kelimbettiń uly Nemat tiri kezinde qolynan kelgen barlyq jaqsylyǵyn jasaǵanyn saǵynyshpen eske alǵan olar Nemat Kelimbetovtiń kózi ketken soń kóshe eshkimge kerek bolmai qaldy dep qynjyldy. Óitkeni aýyl halqy topyraqtan kóz ashpai otyr. Degenmen sý men gazdan qinalmai otyrǵan turǵyndardyń júzinen buǵan da shúkirshilik degendi baiqadyq. Sebebi bul kósheden sál joǵaryraqta ornalasqan Jańa qurylys aýmaǵynyń turǵyndary úshin sý men gaz arman bolyp otyr.
44 jasynda Ulttyq bank tóraǵasy bolǵan Qairat Nematulynyń el ishindegi tanymaldylyǵy 2015 jyldyń basyndaǵy devalvatsiiadan soń arta tústi. Bir túnniń ishinde dollar sharyqtap ketken sátte "devalvatsiianyń bolǵanyn túnde ǵana estidim" dep kóptiń shamyna tigen bolatyn. Osydan keiin áleýmettik jelilerde bankirdi keleke etken fotolar qaptap ketti.
Derekkóz: Nur.kz
