Memleket basshysy Qasym-Jomart Toqaev Qazaqstan halqyn Jeńis kúnimen quttyqtady,- dep habarlaıdy Dalanews.kz Aqordaǵa silteme jasap.

"Qurmetti otandastar!

Sizderdi Uly Jeńistiń 80 jyldyǵymen shyn júrekten quttyqtaımyn!

Osy mereıli kúndi elimizdiń árbir azamaty erekshe kóńil-kúımen qarsy alyp, Jeńimpaz aǵa býynǵa sheksiz rızashylyǵyn bildiredi.

Fashızmge qarsy surapyl soǵys halqymyzǵa orasan zor qaıǵy-qasiret ákeldi. Bizdiń qaharman jaýyngerlerimiz asqan erlik pen batyldyq tanytyp, azattyq pen ádildik jolynda aıanbaı kúresti. Júz myńdaǵan sarbazymyz urys dalasynda qaza tapty. Tyldaǵy jurt ta adam aıtqysyz qıyndyqqa qaramastan tynymsyz ter tógip, Jeńisti jaqyndatýǵa ólsheýsiz úles qosty. Olar egis alqabynda, zaýyttar men fabrıkalarda kún-tún demeı jumys istep, maıdandy qamtamasyz etti", - dedi Prezıdent.

Qasym-Jomart Toqaev Qazaqstanda Jeńis kúnine oraı kóptegen is-shara ótkizilip jatqanyn atap ótti.

"Elimiz boıynsha bes júzge jýyq kósheni qaharman erlerimizdiń atymen ataý týraly sheshim qabyldandy. Aýqymdy áskerı sherý ótti. Munyń bári zulmat soǵystyń zardabyn halqymyz eshqashan jadynan shyǵarmaýy úshin qajet.

Biz Jeńis kúninde beıbit ómirdiń qadirin uǵynyp, dostyq pen tynyshtyqtyń mańyzdylyǵyn tereń túsinemiz. Osy myzǵymas qundylyqtar árdaıym halqymyzdyń ál-aýqatyn arttyrýdyń jáne Qazaqstandy turaqty damytýdyń berik negizi bolyp qala beredi. Men buǵan kámil senemin.

Qadirli ardagerlerimizge jáne barsha otandastarymyzǵa zor densaýlyq, baq-bereke tileımin! Uly Jeńis kúni qutty bolsyn!" - dedi memleket basshysy.