Qyzylorda oblysynyń politsiiasy Jańaqorǵan kentiniń ortalyq kóshesimen jol erejesin óreskel buzǵan toi kortejiniń 15 qatysýshysyn jaýapqa tartty. Buǵan deiin aýdandyq politsiia bólimi jeti júrgizýshiniń anyqtalǵanyn málimdegen edi, dep habarlaidy dalanews.kz.
Polites.news málimetinshe, oqiǵa 23 tamyzǵa qaraǵan túni bolǵan. Toi kortejiniń videosyn EGOV.PRESS Telegram-arnasy jariialady. Kadrlardan jeńil avtokólikterdiń tutas syzyqty kesip ótip, jol jiegimen jáne qarsy baǵyttaǵy jolaqpen júrgenin kórýge bolady. Sondai-aq olar basqa júrgizýshilerdiń qozǵalysyna kedergi keltirip, bir sátte joldy tolyǵymen jaýyp tastaǵan. Kólikterdiń birine "Bratva jeniha" degen jazý japsyrylǵan.
Oqiǵa ornynda patrýldik politsiia ekipajdary da bolǵan. Alaida videodan tártip saqshylarynyń kortejdi toqtatýǵa áreket jasaǵany nemese ony súiemeldep júrgeni anyq kórinbeidi. Bul másele áleýmettik jeli qoldanýshylary arasynda qyzý talqylandy.
Ishki ister ministrliginiń resmi málimetinshe, quqyq buzýshylyqtar áleýmettik jelilerge monitoring júrgizý kezinde anyqtalǵan. Politsiia 21 men 35 jas aralyǵyndaǵy 15 adamdy anyqtap, bólimshege jetkizgen. Olardyń 13-i – Qyzylorda oblysynyń Jańaqorǵan aýdany, Almaty jáne Jambyl oblystary men Shymkent qalasynyń turǵyndary.
Tekserý qorytyndysy boiynsha 56 ákimshilik hattama toltyrylyp, quqyq buzýshylarǵa aiyppul salyndy. Qarsy baǵyttaǵy jolaqqa shyqqan úsh júrgizýshi sot sheshimimen kólik basqarý quqyǵynan aiyrylady. Eki adam ákimshilik qamaýǵa alynyp, tórt avtokólik mamandandyrylǵan aiyp turaǵyna qoiyldy. Barlyq qatysýshyǵa resmi eskertý jasaldy.
Ákimshilik materialdar usaq buzaqylyq, eldi mekende pirotehnikalyq buiymdardy qoldaný, tehnikalyq aqaýy bar kólikti basqarý, apattyq jaǵdai týǵyzý, júrgizýshi kýáliginsiz kólik júrgizý, jol bóliginde ornalasý, qarsy ótý jáne basyp ozý talaptaryn buzý faktileri boiynsha rásimdelgen.
Bastapqyda aýdandyq politsiia bólimi jeti júrgizýshiniń anyqtalǵanyn jáne tórt túrli bap boiynsha shara qoldanylǵanyn habarlaǵan. Keiin IIM usynǵan aqparatta jaýapqa tartylǵandar sany 15-ke, al ákimshilik materialdar sany 56-ǵa jetkeni belgili boldy. Orta eseppen ár qatysýshyǵa tórtke jýyq hattamadan kelgen.
2026 jyly Qazaqstanda ailyq eseptik kórsetkish 4 325 teńgeni quraidy. Qarsy baǵyttaǵy jolaqqa shyqqandar alty aiǵa júrgizýshi kýáliginen aiyrylýy múmkin. Kólik basqarý quqyǵy joq adamnyń rólge otyrýy 86 500 teńge, al apattyq jaǵdai týǵyzý 43 250 teńge aiyppul salýǵa ákep soǵady. Usaq buzaqylyq úshin 86 500 teńge aiyppul, 20-dan 60 saǵatqa deiin qoǵamdyq jumys nemese 5-ten 15 táýlikke deiin ákimshilik qamaý qarastyrylǵan.
Politsiia ókilderi toi kortejderi men merekelik sherýler jol erejesin buzýǵa negiz bolmaitynyn eskertip, júrgizýshilerdi ózge adamdardyń ómiri men densaýlyǵyna qaýip tóndirmeýge shaqyrdy.
