Qaraǵandy turǵyny qala ákimine qatysty ákimshilik talap qoiyp, sotqa júgindi. Ol jeke turǵyn úi salý úshin jer ýchaskesine jekemenshik quqyǵyn berý týraly ákimdiktiń qaýlysyn zańsyz dep tanýdy suraǵan, dep habarlaidy Dalanews.kz.
Talap qoiýshynyń pikirinshe, daýly jer ýchaskesi jer zańnamasyn buza otyryp berilgen. Atalmysh jer ýchaskesinde onyń injenerlik kommýnikatsiialary ornalasqan, sondai-aq úiden kóshege shyǵatyn jol jabylǵan, osylaisha ákimniń qaýlysy onyń quqyǵy men zańdy múddesin buzǵan.
"Sot jergilikti atqarýshy organ daýly jer ýchaskesin bergen kezde jer zańnamasynyń talaptaryn buzǵanyn anyqtady. Osylaisha, ákimdik qaýlysymen D.-nyń jer ýchaskesi memleket menshigine alynyp, onyń ornyna 0,1 gektar aýmaqtaǵy jeke turǵyn úi salý úshin daýly jer ýchaskesine jekemenshik quqyǵy berilgen. Daýly jer ýchaskesi talap qoiýshynyń jer ýchaskesiniń aldynda ornalasqan, osylaisha kóshege shyǵatyn joldy jaýyp tur. Sonymen qatar, osy ýchaskede onyń kommýnikatsiialary bar. Budan bólek, qalanyń sáýlet jáne qala qurylysy bólimi talap qoiýshyǵa jeke turǵyn úidiń jobalaý jáne qurylysyn júrgizýge arnalǵan sáýlet-josparlaý tapsyrmasyn bekitken", - delingen is materialynda.
Eskizdik joba kelisilip, oǵan sáikes talap qoiýshynyń kólik joly joǵaryda atalǵan kóshe arqyly qarastyrylǵan. Osylaisha, qaýly ákimshilik organnyń keiingi áreketterimen kelispei, talap qoiýshyny ózine tiesili jer ýchaskesi men ǵimaratqa kiretin joldan aiyryp otyr.
Sot Qaraǵandy qalasy ákimdiginiń qaýlysyn zańsyz dep tanyp, talap qoiýshynyń talaptaryn oryndy dep tapty.
