Qaraǵandy oblystyq soty «ArselorMittal Temirtaý» kompaniiasyna tiesili bolǵan «Qazaqstan» shahtasynda bes shahterdiń qaza bolýyna bailanysty is boiynsha sottalǵandardyń apelliatsiialyq shaǵymdaryn qarap, alǵashqy úkimdi ózgerissiz qaldyrdy, dep habarlaidy Dalanews.kz QazTAG-qa silteme jasap.
«Jábirlenýshiler tarapynan apelliatsiialyq shaǵym túsken joq. Biz úkimniń ózgerissiz qalǵanyna rizamyz. Sotta jábirlenýshilerdiń kóbi bolmady», – dedi QazTAG tilshisine jábirlenýshilerdiń biri.
Sottalǵandar apelliatsiialyq shaǵymdarynda ózderine taǵylǵan aiyptaýlardy alyp tastap, aqtaýdy suraǵan. Alǵashqy instantsiiadaǵy sot protsesinde-aq qorǵaýshylar olardyń kinásiz ekenin aityp, úkimniń aqtaýshy bolýyn talap etken edi. Advokattar aiyptalýshylardy «kináliler dep taǵaiyndaǵanyn» málimdep, isti prokýrorǵa qaitaryp, sapasyz konveier taspasyn satyp alýdaǵy buzýshylyqqa naqty kim kináli ekenin anyqtaýdy suraǵan.
2024 jylǵy aqpanda Shahtinsk qalalyq soty tórt aiyptalýshyny qaýipsizdigi tómen koloniiaǵa tórt jyl bas bostandyǵynan aiyrýǵa jáne úsh jylǵa deiin taý-ken óndirisi salasynda basshylyq qyzmet atqarý quqyǵynan aiyrý jazasyna kesken bolatyn. Sottalǵandardyń qatarynda – apat kezinde shahtanyń óndiris jónindegi direktor orynbasarynyń mindetin atqarýshy (bul qyzmette bir aidan az ýaqyt istegen), konveierlik kólik ýchaskesiniń bastyǵy, onyń orynbasary (bir jyldan az eńbek ótilimen), sondai-aq ýaqytsha mehanik orynbasary bolǵan jumysshy bar.
Sot olardyń «taý-ken jáne qurylys jumystary kezinde qaýipsizdik talaptaryn buzyp, abaisyzda eki nemese odan da kóp adamnyń ólimine sebepker bolǵan» degen bap boiynsha kinásin dáleldendi dep tanydy. Sýdia Daniiar Álmenovtiń aitýynsha, aiyptalýshylar óndiristegi buzýshylyqtarǵa qaramastan jumysty toqtatpaǵan, ortasha janǵysh taspany ornatýǵa jol bergen, sondai-aq jóndeý aýysymyna qajetti jumys nariady berilmegeni anyqtalǵan.
Sot buǵan deiin qaitys bolǵandardyń otbasylary talap etken moraldyq ótemaqyny tóleý týraly azamattyq talaptardy qanaǵattandyrmaǵan. Jábirlenýshiler shahta men AMT kompaniiasynyń joǵary basshylyǵy da sot aldynda jaýap berýi tiis ekenin aitqan. Keibir otbasylar sottan qatań jaza taǵaiyndaýdy surasa, endi bireýleri sheshimdi sottyń qaraýyna qaldyrǵan nemese aiyptalýshylardy bas bostandyǵynan aiyrmaýdy suraǵan. Keibiri olardyń kinási tek jartylai ekenin aitsa, taǵy bireýleri aqtaý úkimin shyǵarýdy suraǵan.
«Qazaqstan» shahtasyndaǵy tragediia 2023 jylǵy 17 tamyzda oryn aldy. Órt saldarynan bes shahter — 26 jastaǵy Ilia Starovoit, 29 jastaǵy Artýr Halikov, 45 jastaǵy Denis Steshin, 56 jastaǵy Viktor Býrgýn jáne 58 jastaǵy Vitalii Sliýnkov qaza tapty. Tergeý nusqasyna sáikes, olar kómirqyshqyl gazynan ýlanǵan. Taǵy 17 jumysshy túrli jaraqat aldy. Bilik bul oqiǵa úshin jumys berýshi — AMT-ny tolyq kináli dep málimdegen. Qaiǵyly jaǵdaiǵa bailanysty 28 adamnyń jaýapty ekeni aitylǵanymen, olardyń tek tórteýi ǵana sotqa tartyldy.
2024 jylǵy maýsymda Shahtinsk soty 2022 jyldyń qarashasynda jarylys bolyp, bes jumysshy qaza taýyp, tórteýi aýyr jaraqat alǵan Lenin atyndaǵy shahta boiynsha da tórt qyzmetkerge ártúrli merzimge bas bostandyǵynan aiyrý jazasyn taǵaiyndady. Alaida marqumdardyń týystary qansha talap etkenimen, AMT-nyń joǵary basshylyǵy men menshik ieleri jaýapkershilikke tartylǵan joq.
Qazir Qaraǵandyda Kostenko atyndaǵy shahtada 46 shahter qaza taýyp, 28-i jaraqat alǵan jarylysqa qatysty is qaralyp jatyr. Aiyptalýshylar qatarynda shahta basshylyǵy men injenerlik-tehnikalyq qyzmetkerlerden turatyn 10 adam bar. Bul oqiǵa – milliarder Lakshmi Mittaldyń «ArselorMittal Temirtaý» kompaniiasyn basqarǵan sońǵy 30 jyl ishindegi eń kóp adam ólimine ákelgen apat boldy.
