Qaraǵandy oblysynda múmkindigi shekteýli balaǵa merzimi ótken dári-dármek berilgen. Preparat jergilikti ambýlatoriiadan alynǵan, dep habarlaidy Dalanews.kz 31 arnaǵa silteme jasap.
Anasy bul jaidy balasynyń jaǵdaiy kúrt nasharlaǵan kezde ǵana baiqaǵan,
Aliia Moskalenkonyń ulyna 8 jasta, oǵan mi qurylymynyń organikalyq zaqymdanýy jáne epilepsiia diagnozy qoiylǵan. Kúndelikti ómirdiń qarapaiym daǵdylarynyń ózi balaǵa asa qiyn. Bir jarym jyl boiy remissiiada júrgen. Alaida mamyr aiynda aýyr ustama qaitalanyp, balanyń jetken jetistikteri keiinge ketip, jaǵdaiy kúrt nasharlaǵan. Sol kezde Aliia jergilikti ambýlatoriiadan alǵan epilepsiiaǵa qarsy dáriniń jaramdylyq merzimi naýryzda ótip ketkenin baiqaidy. Al dári mamyrda berilgen. Buryn berilgen dári de jaramsyz bolyp shyqqan.
"Bul óte óreskel zańbuzýshylyq dep esepteimin. Bul – sotta qaralýy tiis is. Men muny jaiyna qaldyrmaimyn, óitkeni bizdiń balalarymyzdyń qansha ómir súretini bir Allaǵa ǵana aian. Al olardyń ómirin ádeii ýlap, densaýlyǵyna ziian keltirýge eshkimge ruqsat etpeimin", – dedi Aliia Moskalenko.
Aýyl ambýlatoriiasyna qaraityn aýdandyq aýrýhana kamera aldynda pikir bildirýden bas tartty. Dáriger preparatty 2024 jylǵy 31 jeltoqsanda taǵaiyndaǵanyn aityp otyr. Anasyna bul týraly 1414 qyzmeti arqyly da, medqyzmetkerler telefon arqyly da habarlaǵan. Alaida Aliia buǵan deiin berilgen dári jetkilikti ekenin aitqan kórinedi.
