قاراعاندى وبلىسىندا مۇمكىندىگى شەكتەۋلى بالاعا مەرزىمى وتكەن دارى-دارمەك بەرىلگەن. پرەپارات جەرگىلىكتى امبۋلاتوريادان الىنعان، دەپ حابارلايدى Dalanews.kz 31 ارناعا سىلتەمە جاساپ.

اناسى بۇل جايدى بالاسىنىڭ جاعدايى كۇرت ناشارلاعان كەزدە عانا بايقاعان، 

اليا موسكالەنكونىڭ ۇلىنا 8 جاستا، وعان مي قۇرىلىمىنىڭ ورگانيكالىق زاقىمدانۋى جانە ەپيلەپسيا دياگنوزى قويىلعان. كۇندەلىكتى ءومىردىڭ قاراپايىم داعدىلارىنىڭ ءوزى بالاعا اسا قيىن. ءبىر جارىم جىل بويى رەميسسيادا جۇرگەن. الايدا مامىر ايىندا اۋىر ۇستاما قايتالانىپ، بالانىڭ جەتكەن جەتىستىكتەرى كەيىنگە كەتىپ، جاعدايى كۇرت ناشارلاعان. سول كەزدە اليا جەرگىلىكتى امبۋلاتوريادان العان ەپيلەپسياعا قارسى ءدارىنىڭ جارامدىلىق مەرزىمى ناۋرىزدا ءوتىپ كەتكەنىن بايقايدى. ال ءدارى مامىردا بەرىلگەن. بۇرىن بەرىلگەن ءدارى دە جارامسىز بولىپ شىققان.

"بۇل وتە ورەسكەل زاڭبۇزۋشىلىق دەپ ەسەپتەيمىن. بۇل – سوتتا قارالۋى ءتيىس ءىس. مەن مۇنى جايىنا قالدىرمايمىن، ويتكەنى ءبىزدىڭ بالالارىمىزدىڭ قانشا ءومىر سۇرەتىنى ءبىر اللاعا عانا ايان. ال ولاردىڭ ءومىرىن ادەيى ۋلاپ، دەنساۋلىعىنا زيان كەلتىرۋگە ەشكىمگە رۇقسات ەتپەيمىن"، – دەدى اليا موسكالەنكو.

اۋىل امبۋلاتورياسىنا قارايتىن اۋداندىق اۋرۋحانا كامەرا الدىندا پىكىر بىلدىرۋدەن باس تارتتى. دارىگەر پرەپاراتتى 2024 جىلعى 31 جەلتوقساندا تاعايىنداعانىن ايتىپ وتىر. اناسىنا بۇل تۋرالى 1414 قىزمەتى ارقىلى دا، مەدقىزمەتكەرلەر تەلەفون ارقىلى دا حابارلاعان. الايدا اليا بۇعان دەيىن بەرىلگەن ءدارى جەتكىلىكتى ەكەنىن ايتقان كورىنەدى.