Qaqaǵan qysta muzdai sýǵa túsip ketken eki atyraýlyqty aman alyp qalǵan politseiler marapattaldy, - dep habarlaidy Dalanews.kz.
Erlik qylý - antyna berik, elin súigen erdiń isi. Búginde quqyq qorǵaý organdaryndaǵy qyzmet eldiń ishki qaýipsizdiginiń qalqanyna ainalǵandai. Sebebi, saqshylar beibit kúnde el tynyshtyǵy men qaýipsizdigi úshin, tipti ózderine tóngen qaýip-qaterge qaramastan azamattarǵa kómekke kelýge árqashan daiyn.Erlik pen eldiktiń úlgisin kórsete bilgen qos saqshy osyǵan dálel. Olar politsiia aǵa leitenanty Roman Serikuly men Jandos Shaphatuly. Politseiler Atyraý oblysy, Qurmanǵazy aýdany politsiia bóliminde qyzmet etedi.
Memleket basshysynyń Jarlyǵymen áskeri jáne qyzmettik boryshyn atqarýda kórsetken erligi men janqiiarlyǵy, eldiń ulttyq qaýipsizdigi men qorǵanys qabiletin qamtamasyz etýge, zańdylyq pen quqyqtyq tártipti nyǵaitýǵa qosqan úlesi úshin Baýyrjan Momyshuly atyndaǵy II dárejeli «Aibyn» ordenimen Atyraý oblysynyń Qurmanǵazy aýdany politsiia bóliminiń inspektory Nasihan Roman Serikuly marapattaldy. Ibatýllaev Jandos Shaphatuly QR Ishki ister Ministri politsiia general-leitenanty E.S. Sadenovten Baýyrjan Momyshuly atyndaǵy II dárejeli «Aibyn» medalimen marapattalyp, keýdelerin alǵashqy tósbelgimen tolyqtyrdy. «Aibyn» medali naǵyz erlik kórsetkenderge ǵana beriletin memlekettik marapat ekenin biri bilse, biri bilmes…
Marapat mereidi asqaqtatady, degenmen eń motivatsiiaǵa toly marapat ol - halyqtyń alǵysy dep bilemiz deidi saqshylar. Degenmen, tártip saqshylarynyń shuǵyl áreketi arqasynda bir qater artta qalǵandai. Búginde bul oqiǵanyń oryn alǵanyna 6 aiǵa jýyq ýaqyt ótse de, sol kúngi muz oiyǵyna túsken jannyń jan aiqaiy Roman men Jandostyń áli kóz aldynda.
Oqys oqiǵa 2023 jyly 25 jeltoqsan kúni saǵat 19:20 shamasynda Qurmanǵazy aýdanynyń Sharon ózeninde boldy. Qystyń yzǵary endi sezile bastaǵan mezgil. Orta jastaǵy áiel muz ústimen ótýdi jón kóredi. Alaida, sý qatelikti keshirmeidi... Bul ýaqytta aýdandyq politsiia bóliminiń saptyq jiynynan tarap kele jatqan politsiia qyzmetkerleri tez arada oqiǵa ornyna jetýge baǵyttama alady. Habarlamany estigen Tárbie jáne kadr bólimshesiniń inspektory Roman Nasihan da ýaqyt ótkizbei jeke avtokóligimen oqiǵa ornyna jetken.
Oqiǵa ornyna birinshi jetken ol avtokólikten arqan jip alyp muz ústine shyǵady. Shyǵar sátte kómekke kelgen er adamnyń da muz oiyǵyna túsip ketkenin kórgen. Sol kezde patrýldik politsiia bóliminiń qyzmetkerleri men Jandos Ibatýllaev kómekke kelip, sýǵa ketken áiel adam men ony qutqarýǵa oqtalyp ózi de oiylǵan muz qursaýynda qalǵan er adamdy qutqaryp qalǵan. Juqa muz ústine bir ýaqytta 10-ǵa jýyq adam shyqqan sátte muz oiyǵy odan ári úlkeigen. Biraq, bar kúsh-jigeri men mol tájiribesin salǵan politsiia qyzmetkerleri adam ómirine arasha bolar sátte aiazdy kún men muzdy sýǵa qaramastan 27 jastaǵy politsei oqys oqiǵaǵa kýá bolyp bei-jai qaramaǵan azamat pen 64 jastaǵy áiel adamdy jaǵaǵa aman-esen shyǵardy.
Allanyń qoldaýy shyǵar, ekeýmiz de sýmen jantalasyp júrip, jaǵaǵa ázer shyqtyq. Halyqqa kómektesken kez qandai keremet sezim... Qala men aýyl turǵyndarynyń alǵysyn estip, áleýmettik jelidegi videonyń astyna jazylǵan nebir jaqsy sózderdi oqyp, erekshe áserge bólengen edik. Keiin Memleket basshysy men Ishki ister Ministriniń «Aibyn» medalin tabystaý kezinde dán riza boldyq. Eger de osyndai jaǵdaiǵa taǵy tap bolsaq, dál osylai áreket qylamyz. Sebebi, biz úshin eń bastysy - halyqtyń amandyǵy. Osylai eńbegimizdi elep, úlken qurmetke laiyq qylǵan Memleket basshysyna bek raqmet, - dedi atyraýlyq politsiia qyzmetkerleri.
Qiyndyǵy men qyzyǵy ushtasqan salany tańdap, Otan aldyndaǵy antyn berip, ony berik ustanyp júrgen atyraýlyq politseiler eshqashan qaýipten qashqan emes. Kez-kelgen adamnyń basyna qaýip tónse, kómekke kelýge ázir! Roman men Jandostyń Memlekettik marapattaýdy iemdenýi, bul olardyń eren eńbeginiń jemisi. Qurmanǵazy aýdanynda aǵa leitenant dárejesinde júrip-aq jas politseilerdiń jasaǵan bul erlik is barshaǵa úlgi.
Asylai Jumajanova
Atyraý oblysy politsiia departamenti
Aqparattyq saiasat bóliminiń inspektory
