Qańtar oqiǵasy kezinde urlanǵan qarýǵa qatysty kúdiktiler Almaty oblysynda ustaldy, dep habarlaidy Dalanews.kz Ishki ister ministrliginiń baspasóz qyzmetine siltep.
«21 myńnan astam azamattyq qarý iesi tekserildi, olardyń 400-den astamy ákimshilik jaýapkershilikke tartyldy. Osylaisha, aǵymdaǵy jyldyń 5 qyrkúieginde Almaty oblysynda osy óńirdiń turǵyndary ustalyp, olardan Almaty qalasyndaǵy qańtar oqiǵasy kezinde urlanǵan arnaiy myltyq tárkilendi. Bul baǵyttaǵy jumys jalǵasýda», – dedi IIM kriminaldyq politsiia departamenti basqarma bastyǵynyń orynbasary Jandos Batyrbekov.
Aita keteiik, 1 qyrkúiekten bastap el aýmaǵynda «Ýchaske» respýblikalyq jedel-aldyn alý is-sharasy ótip jatyr. Onyń aiasynda zańsyz ainalymdaǵy qarýdy anyqtaý jumystary kúsheitilgen.
«Shara bastalǵaly beri zańsyz ainalymnan shamamen 50 qarý birligi, 500-den astam oq-dári jáne alty jarylǵysh qurylǵy alyndy; qarý-jaraq pen oq-dáriler jasyrylǵan 12 qoima tabyldy; «qańtar oqiǵasy» kezinde urlanǵan alty qarý jáne politsiianyń jabdyqtary tárkilendi. Onyń ishinde bir avtomat, bir tapansha, eki oiyq karabin jáne eki tegis uńǵyly myltyq, sondai-aq qyzmettik bronejiletter men kaskalar bar. Budan bólek, el turǵyndary óz erkimen 15 qarýdy tapsyrdy», – dep naqtylady IIM.
