Qazaqstan Respýblikasy Premer-Ministriniń orynbasary Qanat Bozymbaev sý tasqyny kezeńine daiyndyq máseleleri boiynsha keńes ótkizdi. Jiynda ol sý sharýashylyǵy nysandarynyń, joldar men kópirlerdiń, sondai-aq áreket etý kúshteri men quraldarynyń daiyndyq deńgeiin tekserdi, dep habarlaidy Dalanews.kz.
Sonymen qatar, vitse-premer «Talsim» júiesiniń boljamdy derekterimen jáne «Tasqyn» júiesindegi sý tasqyny jaǵdaiyn modeldeý nátijelerimen tanysty.
Keńes barysynda qaýip deńgeii joǵary aimaqtarǵa jatqyzylǵan óńirlerdiń esepteri de tyńdaldy.
Resmi málimetke sáikes, óńirlerde sý tasqynynyń aldyn alýǵa baǵyttalǵan jumystardyń edáýir bóligi atqarylǵan. Atap aitqanda, 831 shaqyrym qorǵanys bógeti men úiindiler salynǵan, 1 myń shaqyrymnan astam drenaj júiesi, kanaldar men aryqtar jóndelip, qaita salynǵan.
Sondai-aq avtomobil jáne temirjol ýchaskelerinde 934 sý ótkizý qurylysy ornatylyp nemese aýystyrylǵan. Shyǵys Qazaqstan jáne Qostanai oblystarynda kópirlerge kúrdeli jóndeý jumystary júrgizilgen.
Qanat Bozymbaev óńir ákimdikterine sý tasqynyna daiyndyqty 2026 jylǵy 1 naýryzǵa deiin tolyq aiaqtaýdy tapsyrdy.
