Astanada kórnekti jazýshy, jýrnalist jáne arhivtanýshy Tabyl Qulyiastyń 90 jyldyǵyna arnalǵan «Tańdamaly» shyǵarmalar jinaǵynyń VI tomynyń tusaýkeseri ótti, dep habarlaidy Dala News.
Is-shara 7 aqpan kúni L.N. Gýmilev atyndaǵy Eýraziia ulttyq ýniversitetiniń Ǵylymi kitaphanasynda uiymdastyryldy. Keshke ziialy qaýym ókilderi, qalamgerler, ádebiettanýshy ǵalymdar, stýdentter men ádebiet súier qaýym qatysty.
Tusaýkeser barysynda Tabyl Qulyiastyń shyǵarmashylyq joly, qazaq ádebieti men jýrnalistikasyndaǵy orny keńinen sóz boldy. Qatysýshylar qalamgerdiń arhiv derekterine súienip jazǵan eńbekteriniń tarihi jáne rýhani mańyzyn erekshe atap ótti. Onyń týyndylary qoǵam shyndyǵyn dál beineleitin, oi tereńdigimen erekshelenetin eńbekter retinde baǵalandy.
Filologiia ǵylymdarynyń doktory, professor, Qazaqstannyń eńbek sińirgen qairatkeri Serik Negimov Tabyl Qulyiasty qazaq satirasynyń kórnekti ókili retinde atap ótti.
«Tabyl Qulyias – arhiv pen ádebietti qatar meńgergen sirek qalamger. Onyń satiralyq áńgimeleri men prozalyq eńbekteri qoǵamnyń shynaiy kelbetin aiqyn kórsetedi», – dedi ǵalym.
Onyń aitýynsha, jazýshynyń shyǵarmalary qazaq tiliniń bailyǵyn, oilaý mádenietin jáne filosofiialyq qýatyn tereń ashady. Tabyl Qulyiastyń pýblitsistikalyq jáne satiralyq týyndylary arqyly belgili bir tarihi kezeńniń bolmysy, qoǵamdaǵy qaishylyqtar kórinis tabady.
«Tańdamaly» jinaǵynyń altynshy tomyna avtordyń ár jyldary jazǵan pýblitsistikalyq maqalalary, tarihi-tanymdyq zertteýleri men oi-tolǵamdary engen. Bul eńbek qalamger murasyn júielep, keiingi býynǵa jetkizýdi maqsat etedi.
Jiyn barysynda sóz alǵandar atalǵan jinaq jas jýrnalister men zertteýshiler úshin mańyzdy derekkóz ekenin atap ótti. Sonymen qatar, Tabyl Qulyiastyń eńbekteri búgingi qoǵam úshin de ózektiligin joǵaltpaǵany aityldy.
Tabyl Qulyiastyń 90 jyldyǵyna arnalǵan bul rýhani basqosý qazaq ádebieti men arhiv ǵylymyna eleýli úles qosqan tulǵanyń eńbegin ulyqtaǵan taǵylymdy shara retinde ótti.
