Pýtinnen «qazaq jerlerin qaitarýdy» talap etken Jansulý Darhambaevaǵa qatysty sot úkimi shyqty, dep habarlaidy Dalanews.kz.
Ol áleýmettik, ulttyq, rýlyq, násildik nemese dini arazdyqty qozdyrdy degen aiyppen eki jylǵa bas bostandyǵynan aiyryldy.
BAQ málimetinshe, Darhambaeva Resei prezidentine baǵyttap birneshe video jariialap, onda Pýtindi qazaq jerlerin qaitarýǵa úndegen. Atap aitqanda, ol reseilikterge "qazaq jerin qaitarmasańdar – ólesińder" degen mazmunda úndeý joldaǵan.
Darhambaevanyń aitýynsha, Altai, Orynbor, Astrahan, Kýrsk, Tom, Qorǵan, Saratov jáne Novosibir oblystaryna qatysty "júz jylǵa berilgen jaldaý merzimi" biyl aiaqtalýy tiis.
Bul is Reseidiń ondaǵan aqparat quralynda jazyldy. Olar Darhambaevany "rýsofobiialyq kózqarasy bar adam" dep sipattap, onyń túrmege qamalýy jai ǵana "formaldyq jaza bolýy múmkin" dep boljaidy.
Reseilik basylymdardyń biri Qazaqstanda sońǵy ýaqytta mundai málimdemeler jiilep ketkenin, elde "jańa tarihpen" oqýlyqtar shyǵarylyp jatqanyn, blogerlerdiń osyǵan uqsas videolar jariialap júrgenin jáne Ýkrainadaǵydai "til patrýlderiniń" paida bola bastaǵanyn alǵa tartady.
