Qazaqstan Respýblikasynyń prezidenti Qasym-Jomart Toqaev qazaqstandyqtardy Alǵys aitý kúnimen quttyqtady, dep habarlaidy Dalanews.kz
Qurmetti otandastar!
Sizderdi Alǵys aitý kúnimen quttyqtaimyn! Bul – halqymyzdyń eń asyl qundylyqtaryn dáripteitin erekshe mereke. Ózara qurmet kórsetý, ózgege janashyrlyqpen qarap, shynaiy tileýles bolý – ultymyzdyń boiyna sińgen qasietter. Alǵys aitý dástúri tól rýhaniiatymyzdyń temirqazyǵy retinde el ishindegi senim men birlikti nyǵaitýǵa zor yqpal etip keledi. Jaqyndarymyzǵa alǵys aitý – olarǵa rýhani qoldaý kórsetý, qiyn kezde qol ushyn sozý degen sóz. Qazirgi qubylmaly zamanda bul qasiettiń mán-mańyzy erekshe, dep atap ótti prezident.
Sonymen qatar, osy meiramda qiyn-qystaý jyldary elimizdi aman saqtap, urpaqqa asa qundy ári mol mura qaldyrǵan ata-babalarymyzǵa taǵzym etýdi, ustazdarǵa, dárigerlerge, mádeniet salasy qyzmetkerlerine, kásipkerlerge, jumysshylarǵa, tártip saqshylaryna, órt sóndirýshilerge, qutqarýshylarǵa jáne adal eńbegimen súiikti Otanymyzdyń ósip-órkendeýine eleýli úles qosyp júrgen barsha azamatqa alǵys aitý keregin aitty.
Sondai-aq jastarǵa jáne eriktilerge erekshe rizashylyq bildirdi. Belsendi azamattyq ustanymy bar, qoǵam igiligi úshin eńbek etýge ázir, muqtaj jandarǵa kómektesýge daiyn adamdardyń eńbegi eren ekenin, bul otanshyldyqtyń aiqyn kórinisi dedi Toqaev.
Alǵys aitý kúni el taǵdyry árbir azamattyń qolynda ekenin ańǵartady. Sebebi aldaǵy ózgeristerdiń tabysty júzege asyrylýy jurtymyzdyń birligine, parasattylyǵyna jáne sanaly azamattyq ustanymyna bailanysty ekeni sózsiz. Biz Zań men Tártip, tilektestik pen yntymaq qaǵidalaryn basshylyqqa alyp, salt-dástúrimizdi saqtai bilsek, Qýatty, Ádiletti, Taza, Órkendegen Qazaqstandy qura alamyz. Tatýlyq pen ózara senimdi nyǵaita otyryp, qasietti Otanymyz – Qazaqstan Respýblikasyn kórkeitý jolynda biik maqsattarymyzǵa birge jetemiz dep senemin. Barshańyzǵa amandyq, tabys tileimin! - dep qorytyndylady memleket basshysy.
