Niide Ómer Halisdemir ýniversitetinde uiymdastyrylǵan alqaly basqosýǵa atalǵan joǵary oqý ornynyń ujymy, akademiialyq utqyrlyq baǵdarlamasymen Túrkiiada bilim alyp jatqan Qazaq memlekettik qyzdar pedagogikalyq ýniversiteti men ózge de qazaqstandyq oqý oryndarynyń magistranttary men doktoranttary qatysty.
Jiyndy Niide Ómer Halisdemir ýniversitetiniń Qazirgi túrki tilderi jáne ádebieti kafedrasynyń meńgerýshisi, professor Hikmet Qorash ashyp, Qazaqstan Prezidentiniń saliqaly saiasaty týraly, baǵdarlamalyq maqalanyń mańyzy jaiynda áńgimeledi.
– Qazaq eli egemendik alǵan ýaqyttan beri qarqyndy ári jyldam damyp, básekege qabiletti elderdiń sapyna qosyldy. Memlekettiń áleýetin arttyrýda Prezident Nazarbaevtyń sińirgen eńbegi orasan zor. Sonymen qatar búginde Qazaqstan týysqan halyqtar yntymaqtastyǵynyń nyǵaiýyna basty uiytqy bolyp keledi. Bul oraida da onyń yqpaly aitarlyqtai. «Túrki áleminiń arhitektory» atanǵan Nursultan Ábishulynyń «Uly dalanyń jeti qyry» atty maqalasynda túrki dúniesiniń genezisi týraly jaqsy oilar aitylǵan. Bul bastama – týystas memleketter arasyndaǵy saiasi-ekonomikalyq jáne rýhani tamyrlastyqty odan ármen nyǵaita túsetindigine senimdimin, – dedi Hikmet Qorash.
Sondai-aq basqosý barysynda Niide Ómer Halisdemir ýniversitetiniń ǵylymi qyzmetkeri Týrgai Dúien, «Qazaqstannyń 100 jańa esim» jobasynyń jeńimpazy, doktorant Qýanysh Jumabek jáne Qyzdar ýniversitetiniń doktoranty Nurgúl Qalieva sóz sóilep, «Rýhani jańǵyrý» baǵdarlamasynyń ómirsheńdigi jaiynda baiandady. Sonymen qatar jas ǵalymdar baýyrlas memleketter yntymaqtastyǵynyń strategiialyq sipatyna toqtaldy.
– Túrkiia men Qazaqstan arasyndaǵy qarym-qatynastar ózara birlikke, dostyq pen senimge negizdelgen. Ortaq tarih pen bir múdde hám ortaq rýhani qundylyqtarǵa baǵyttalǵan áriptestigimiz qarqyndy damyp, ásirese bilim berý men ǵylymdy damytý boiynsha odan ármen nyǵaia túsedi dep oilaimyz. Sebebi, túrki álemin zertteý, zerdeleý – rýhani brend. Qazaqstan Prezidentiniń bastamasymen qaita dúniege kelgen «Máńgilik el» ideiasynyń da negizgi ózegi – Uly dala elin túrki halyqtarynyń ata jurty retinde qabyldaýǵa negizdeý, tamyry tereń ulttyq mádeniettiń saqtalýyn jáne damýyn qamtamasyz etý. Búginde Qazaqstan týysqan halyqtar yntymaqtastyǵynyń nyǵaiýyna negizgi uiytqy bolyp keledi. Buǵan negiz de joq emes. Óitkeni, Qazaq jeri – ejelden Shyǵys pen Batysty, Eýropa men Aziiany jalǵaityn altyn kópir sanalyp kelgen. Qurlyqtar men qundylyqtar toǵysqan Uly dala eli – túrki áleminiń altyn besigi, qasterli qonysy, – dep atap ótti olar.
Jandar ASAN, Qyzdar ýniversitetiniń baspasóz ortalyǵynyń basshysy
